Assi: KNR

Lars Løkke Rasmussen: Pituffik russinut isumannaallisaataavoq

Amerikamiut Pituffimmi sakkutooqarfeqarnerat Issittup pissanganartorsiorfiuneranik annertusaaqataavoq, Aleqa Hammond taama isumaqarpoq. Ministeriunerulli tamanna ilumuunnginnerarpaa sakkutooqarfillu isumannaallisaanermut iluaqutaanerarlugu.

USA-p Pituffimmi sakkutooqarfeqarnera Ruslandimut toqqaannartumik kamassaarutaavoq Issittumilu eqqisseqatigiinnermut ulorianartorsiortitsilluni.

Nunatta Qitornai sinnerlugit Folketingimi ilaasortaq Aleqa Hammond taama isumaqarpoq. Illersornissaqarfiullu Isertortumik paasiniaasuisa nalunaarusiaat qanittukkut saqqummersinneqartoq Folketingimi marlunngormat apeqqarissaartoqarnerani innersuussutigaa.

Ruslandip Issittumi sakkutooqarnikkut amerlisaanera nalunaarusiami atuarneqarsinnaavoq. Tamannalu USA-p nunatsinni sakkutooqarnikkut ingerlataqarneranik pissuteqarpoq, Aleqa Hammond taama oqarpoq.

AAMMA ATUARUK Naalakkersuisut nunanit tamalaanit isiginiarneqartut

- Illersornissaqarfiup Isertortumik paasiniaasuisa nalunaarusiaat atuarlugu USA-p sakkutooqarfiimi pingaarnerit ilaannik Kalaallit Nunaanniititaqarnertaa Danmarkimi taama annikitsigisumik sammineqarnera eqqumiippoq. Nalunaarusiarmi atuaqqissaaraanni ersarilluinnartumik allassimavoq Pituffimmi sakkutooqarfimmi pisut Ruslandip Issittumi sakkutooqarnikkut amerlisaaneranut toqqaannartumik pissutaaqataasut.

Ministeriunerli Lars Løkke Rasmussen naapertorlugu Pituffik tassaavoq Ruslandip sakkutooqarnikkut amerlisaaneranut isumannaallisaataasussaq – killormuunngitsoq.

AAMMA ATUARUK Issittumi suleqatigiinneq sakkutuunik amerlisaanermit aporfilersugaasoq

- Amerikamiut Kalaallit Nunaanniinnerat Pituffimmilu sakkutooqarfik isumannaallisaanermut toqqissisimanissamullu iluaqutaalluinnartutut isigaakka. Tamanna aallaavigaara. Killormoortuami aallaaviginianngilara: Tassalu russit tunngavigalugit isummersorlunga. Danskit Europamiullu tunngavigalugit isummersussaanga.

Ruslandip nunat tamalaat isumaqatigiissutaannik unioqqutitsilluni rakettinik akunnattumik ungasissusilimmut igeriuttakkanik ineriartortitsisimanera Løkkep ilaatigut innersuussutigaa.
- Taamaammat tamanna sakkutooqarfiup peerneranik qisuariaateqarfigisinnaannngilarput – paarlattuanilli imaassinnaavoq amerlisaasoqartariaqarpoq, danskit ministeriunerat taama oqarpoq.

AAMMA ATUARUK PET Nunatsinni immikkoortortaqarfeqalersoq

 

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat