PET Nunatsinni immikkoortortaqarfeqalersoq
Nittartakkatigut nuataasissaqartitsivik Altinget: arktis taama allaaserisaqarpoq.
Politiit isertortumik paasiniaasui, PET, Kunngeqarfimmut tamarmut atuupput, ataatsimillu sulisulimmik Nuummi maanna allaffeqalerput.
AAMMA ATUARUK Issittumi suleqatigiinneq sakkutuunik amerlisaanermit aporfilersugaasoq
Inuiaqatigiinnut siooranarsinnaasunik pitsaaliinissaq, nunallu allat nunatsinnut naalagaaffeqatigiinnulluunniit isertortukkut alapernaarsuisinnaanerinik paasiniaanissaq siunertarineqarpoq.
- Issittup ukiuni kingullerni sammineqarnerulerneranut atatillugu PET-ip isumannaallisaaneq pillugu siunnersuinermik suliaqartussamik Nuummi inissiinera pissusissasimasoorpoq, taassuma aamma PET-ip, pisortat inuiaqatigiinnilu kalaallini namminersorlutik ingerlataqartut aamma Kalaallit Nunaanni Politiit akornanni suleqatigiinneq isumagissavaa, PET-ip attaveqaqatigiinnermut immikkoortortaqarfia Altinget: arktisimut taama ilisimatitsivoq.
AAMMA ATUARUK Ministerip sakkutooqarnikkut annertusaaneq erseqqarinngitsumik akissuteqarfigigaa
Danmarkimi isertortumik paasiniaasartut allat – Illersornissamut qullersaqarfiup isertortumik paasiniaasuisa – ukiumoortumik nalunaarusiaanni inerniliussat ilaattut Issittumi eqqisseqatigiinnerup tatisimaneqarnera oqaatigineqarpoq, pingaartumik Ruslandip issittumi sakkutooqarnikkut annertusaanera pissutigalugu. Tamatumalu kingunerisaanik Issittumi nunat aamma annertusaapput Issittumilu pissanganartorsiorneq annertusineqarluni.
