KNR-imi ajornartorsiorneq: TP-p siulittaasua – taama ingerlaannartoqarsinnaanngilaq
Mette Steenholdt KNR-ip siulersuisuini siulittaasutut tunuarluni sapaatiummat nalunaarpoq. Taanna qaammatini 13-ini siulittaasuuvoq KNR-imilu nutaarsiassaqartitsivimmi pisortap soraarneranit qaammatit marlussuit qanngiutiinnartut siulittaasuujunnaarpoq.
Siulersuisut siulittaasuat tunuarmat nunatsinni Tusagassiuinermi Sulisut Peqatigiiffiani (TP-mi) siulittaasugallartoq Arnaq Nielsen politikerinut piumasaqarpoq.
- Siulersuisuni siulittaasup tunuarnera KNR-imi ajornartorsiuittoqarneranik takutitsivoq.
- KNR-i suliffeqarfissuuvoq pingaarutilik, taamaattumik aaqqiissummik aalaakkaasumik inissiisoqarnissaa neriuutigaara, Arnaq Nielsen oqarpoq.
Nutaarsiassaqartitsivik ajornartorsiortoq
KNR-imi nutaarsiassaqartitsivik pisortamik kalaallisullu oqaasilinnik tusagassiortunik tallimanik maanna amigaateqarpoq.
Taamaattumik politikerit aaqqissuteqarnissaannik TP-p siulittaasorigallagaa naalakkersuisunut kajumissaaruteqarpoq.
- Maanna aalaakkaasumik aaqqiissuteqartoqarnissaa sulisunut pingaaruteqaqaaq, aammali nunatsinnut, taamatummi ingerlaannartoqarsinnaanngilaq, siulittaasoq uparuaavoq.
Politikerit Mette Steenholdtip kingoraartissaanik toqqaalerunik nalilersuilluarnissaat Arnaq Nielsenip piumasaraa, taakkuummatami siulittaasussamik toqqaasussat.
Pisussaaffik kivinneqarsinnaajunnaartoq
Siulittaasunngortussaq aqutsinermik misilittagaqassasoq Arnaq Nielsenip neriuutigaa, KNR-imilu pissutsit ilungersunartut aaqqiiviginiarnerini suliffeqarfimmi sulisooreersut suleqatigillaquai.
Tusagassiuinermi Sulisut Peqatigiiffiat naalakkersuisunut isornartorsiuilluni sapaatit akunnerisa marlunngulersut matuma siorna qisuariaateqarpoq.
- Nunatsinni isorartoqisumi innuttaasut nutaarsiassanik suliarilluakkanik apeqqusiisinnaassusilinnillu ulluinnarsiuteqartussaagaluartut eqqugaapput. Inuiaqatigiinni pissaanerit sisamaattut taaneqartartoq nukillaaraluttuinnarpoq, KNR-illu inuiaqatigiinnut pisussaaffini kivissinnaajunnaarpaa, TP tusagassiuutinut nalunaarummi allappoq.
