Tusagassiutinik ilisimatusartut: KNR-ip ajornartoornera inuiaqatigiinnut ajornartorsiutaasiutaangaatsiarsinnaavoq
Naalagaaffiup pissaanerata sisamaat. Tamat oqartussaaqataanerannut tunngavik. Inuit inuiaqatigiillu susoqarneranik alaatsinaattuat.
Nutaarsiassaqartitsiviit inuiaqatigiinni oqartussaaqataasuni qanoq pingaartiginerat taama kusanartigisumik ersaritsigisumillu nassuiarneqakkajupput. Nutaarsiassaqartitsiviilli, soorlu maanna KNR-imisulli, ilungersualeraangata, inuiaqatigiit ajornartorsiornerannik aamma ersersitsisuusinnaasarput.
Tusagassiutinik ilisimatusartut marluk taama naliliipput.
Kalaallinik tusagassiortussaalatseqinertik peqqutigalugu nutaarsiassiinikinnerusalerniarlutik, KNR-ip aqutsisui sapaatit akunnerata siuliani aalajangerput.
Tassa KNR ukiup massuma sinnerani nutaarsiassiinikinnerusalissaaq, sivikinnerusumik Qanorooqartassaaq unnukkullu arfinermut radioaviisi toqqaannartuunani aallakaateqqitaasassaaq.
Taamaaliornerlu KNR-ip inuiaqatigiinnut sunniinikinneruneranik kinguneqarsinnaavoq.
Københavns Universitetimi tusagassiutinik ilisimatusartoq lektorilu, Henrik Søndergaard, taama isumaqarpoq. Taanna nutaarsiassaqartitsivinnik innuttaasunik kiffartuussinermik isumaqatigiissuteqartunik aamma ilisimatusarsimasuuvoq.
- Nutaarsiassaqartitsiviit innuttaasunik kiffartuussinissamik isumaqatigiissuteqartut inuiaqatigiinnut tunniussaqartussaatitaapput. Taakku tamat oqartussaaqataanerannut politikkikkullu isummernissaannut ikorfartuisussatut pilersitaapput. Taamaammat nutaarsiassaqartitsineq innuttaasunik kiffartuussinissamik isumaqatigiissuteqarnermi qitiuvoq, nutaarsiassaqartitsiviimmi namminersortut illuinnarsiunngitsumik nutaarsiassiinissaat naatsorsuutigineqarsinnaanngilaq, taanna oqarpoq.
Taamaammat nutaarsiassiinikinnerulerneq inuiaqatigiinnut aamma ajornartorsiutaasinnaasoq, taanna aamma isumaqarpoq.
- Nutaarsiassaqartitsineq tamaat isigigaanni, tassaavoq nunagisami susoqarnersoq inuiqatigiit oqaluttuunnissaat taavalu politikkikkut aningaasarsiornikkullu pissaanillit alaatsinaannissaat. Taamaammat nutaarsiassiinikinneruleraanni suliakkiut taanna qasungasumik naammassineqassaaq.
Inuiaqatigiinni mikisuni ajornartorsiutaasinnaaqisoq
Tusagassiorfimmik nukittuumik Innutaasunik kiffartuussisoqanngikkaluarpalluunniit, tamanna tamat oqartussaaqataanerannut ajornartorsiutaasariaqanngitsoq, Ilisimatusarfimmi tusagassiutinik ilisimatusartoq tusagassiortunngorniarfimmilu ilinniartitsisoq Signe Ravn-Højgaard oqarpoq.
Tamat oqartussaaqataaaffigisaannik, taama ittoqanngitsunik, kisianni tusagssiutaasa namminersortut taamatuminnga iliuuseqartuunissaannik kissaateqarfigineqartunik nunarpassuaqartoq, taanna erseqqissaavoq.
Nunanili mikisuni, soorlu Kalaallit Nunaanni, ussassaaruteqartartukittarmat namminersortunik amerlasuunik tusagassiuteqarnissaq ajornakusoortarpoq.
- Tassa KNR-ip nutaarsiassiisarnerminik ikilisaanera, Kalaallit Nunaannimi nutaarsiassaqartitsiviit ikeqimmata, nunami maani tamarmi nutaarsiassiisarnermut tamarmut sunniuteqangaatsiarpoq. Tassalu nutaarsiassiisukippallaarnera kalaallit inuiaqatigiitttut oqartussaaqataanerannut ajornartorsiutaasinnaavoq, taanna oqarpoq.
Henrik Søndergaard Københavns Universitetimeersoq isumaqataavoq.
- Nutaarsiassaqartitsivik innuttaasunik kiffartuussinissamik isumaqatigiissuteqartoq Danmarkimut nunanulluunniit anginernut naleqqiullugu nutaarsiassaqartitsivikinnerusoq inuiaqatigiinnut nutaarsiassiinermik ikilisaagaangat nutaarsiassiisarnera killeqalersarpoq. Ikililereqigaannilu inuiaqatigiinnut paasissutisssiissarnermik inuiaqatigiillu alaatsinaattuattut suliani qitiusoq naammassiuminaatsissavaa, taanna oqarpoq.
KNR-ip sulisussaalatsinera ajornartorsiutaasutuinnaanngitsoq
Politikerit KNR-ip sulisussaaleqineranik aaqqiisussaasuunngitsut, Signe Ravn-Højgaard Ilisimatusarfimmeersoq oqarpoq. Nutaarsiassaqartitsiviilli sapinngisamik pitsaanerpaanik sinaakkuteqarnissaannut akisussaasuusut, taanna oqarpoq.
KNR-ilu atorfinitsitsinermi atukkanik nammineq pitsanngorsaanissaanut periarfissaqarnerulertinneratigut taamaaliorsinnaapput.
- KNR Namminersorlutik Oqartussat isumaqatigiissutaannut pituttorsimammat sulisumik qanoq akissarsiaqartiginissaannik nammineq aalajangiisinnaatitaanngilaq. Sulisussaaleqineralu akissarsiaqarnerusitsisinissamik nammineq neqeroorsinnaannginneranik peqquteqartoq KNR-meersut oqaatigaat, taanna oqarpoq nangillunilu:
- Pissutsit tamakku atorfinittussarsiorniarneranut akornutaasimappata, KNR-ip nammineq isumaqatigiissusiortalernissaa sulisunullu nammineq inissiaqalernissaa politikkikkut aalajangerneqarsinnaavoq.
KNR-illu sulisussaalatsinera ajornartorsiutaasutuinnaq isiginagu allat aamma ajornartorsiutaasutut isigisariaqartut, taanna aamma isumaqarpoq.
Sulisussaalatseqinerami soorlu tusagassiornermik suliaqarnermik pilerinarsaanerunissamut tunngasuni allanik ajornartorsiuteqarnermik immaqa ersersitsisut, taanna oqarpoq.
- KNR-ip innuttaasunik kiffartuussinissamik isumaqatigiissuteqarluni nutaarsiassiisartuusup sulisussaalatsinera ajornartorsiutaasutuinnaq isiginagu aammali Kalaallit Nunaanni pitsaasunik nutaarsiassiiveqarnissamut qularnaareqataasussanik ilinniartitaanermut, sulisussarsiornermi tusagaassiutillu pillugit politikkimut kalluaanera isigisariaqartutut isumaqarfigaara, taanna oqarpoq.
