KNR-imi sulisussaaleqineq: Radioavisit aallakaatinneqartartut ikilisinneqaqqittut

KNR-ip nutaarsiassaqartitsivia kalaallinik tusagassiortussaaleqivoq. Atorfiit sisamat maanna inuttaqanngillat.

Amigaateqarnerup kingunerisaanik pisortaqatigiit sisamanngormat illumiittunut nalunaarput nutaarsiassat aallakaatinneqartartut ikilisinneqaqqissasut. Kinguneraalu, radioavisit kingulliit ullumimiit toqqaannartarunnaassammata. Taarsiullugu ullup qiterarnerani radioavisit aallakaateqqinneqartassapput. KNR-ip nittartagaagut nutaarsiassat saqqummiunneqartartut aamma ikilisinneqassapput, soorluttaaq tv-kkut nutaarsiassat Qanorooq naalisinneqassasoq. Allannguinerit qaammatini marlunni tullerni atuukkallassapput. 

KNR-imi aatsaat taama pisoqanngilaq, unnukkummi radioavisi februaarimi aamma sivikillineqarpoq. 

- Freelancerit arlallit sulisoraavut KNR-illu avataaniit ikiortissarsilluta, kisianni suli amigaateqaqaagut, sulinissanut pilersaarutit – ullaakkoortut, unnukkoortut ilanngutassiortut allallu – inuttaleruminaaqaat amigaateqaqigatta, pingaartumik napparsimasoqartillugu feeriartoqassatillugulu, Annga Lynge, pisortatut qaammatit marluk matuma siornagut aallartittoq oqarpoq.

Tusagassiortut kalaallit danskillu

Pisortap ilisimavaa, sulisussaaleqineq KNR-ip iluani immikkoortortanit allanit sulisunik atornikkut ikiorserneqarsinnaasoq. Tamannali aaqqiinertut isigineqarsinnaangitsoq, Annga Lynge isumaqarpoq. KNR-ip immikkoortortai allat aamma innuttaasunik kiffartuussisussaatitaanermik atsiukkamut ilaanermikkut aallakaatitassiornissamik pisussaaffeqarput. KNR-imilu pissutsit imaannerarpai. 

- Ilungersunartorujussuupput massakkut, oqarpoq nangillunilu.

- Ingammik kalaallisut qallunaatullu nutaarsiassiineq assigiissumik ingerlaavartillugu. Ingerlatinniarsaralugu taakkua naligiinngitsorujussuarmik inissisimapput. Qallunaatut tusagassiortut naammapput kisianni aamma nutserisunik amigaateqartarneq aamma piviusuusimavoq. Taavalu kalaallisut tusagassiortut nutaarsiassaqartitsivimmi ikittuaraajuaannnangajaavillutik. 

Naalakkersuisut attaveqatigineqartut

Sooq taama tusagassiortut kalaallisut oqaasillit pissarsiariuminaatsiginersut aperigatsinni, Annga Lynge akivoq: 

- Tusagassiortutut sulineq assiginngitsorujussuugami. Sulinermi nalimmassapallattussaajuarneq minutsikkaarlugu arlaannik susoqarnissaanut – taamaakkami aamma nutaarsiassaqartitsivimmi sulisut tassuuna pikkoriffeqartut soorunalimi tigusarpavut. Suliaqarnissaq taanna sukkasoorujussuaq arlaatigut aamma sulinermut sunniuteqartarpoq ingammik ikippallaartoqartillugu napparsimasoqalaalerpat imaluunniit arlaatigut feerialluunniit nalaanni taakkua nalimmassarfigipallattuaannartariaqartarput taamatut sulinermi.

Pisortap KNR-imi sulisoqarniarnerup ilorraap tungaanut saatinnissaanut suliartik nangissanerarpaa. Nunaqavissunik tusagassiortunik pissarsiuminaatsitsineq – akissarsiat appasinnerannik sulinermullu atatillugu inissat amigaataanerannik pissuteqartoq, Annga Lynge nassuiaavoq, ilisimatitsissutigalugulu pisortaqatigiillu naalakkersuisoq ataatsimeeqatigisimagitsik. 

- Allakkatigut aamma apuussiffigivagut aamma ulluinnarni attaveqatigiinneq ingerlapparput.

Qaammatini marlunni maani sulivutit. Ajornartoornerup qaangerneqarnissaanut siunnersuutissaqarpit? 

 - Naamik, peqanngilanga. 

Kisiannimi ajornartoorneq qaangerniarlugu ilorraap tungaanut aallarnissaq qulakkeerniarlugu qanoq iliuuseqassavit?

- Isumaqarpunga, suliniarneq aallartilluaripput.