Journalistformand: Tusagassiortut siulittaasuat: KNR-ip aqutsisuinit takorluukkat amigarnerat nutaarsiassaqartitsinermik ikilisaataavoq
- Pissutsit ilungernarluinnartut eqqarsarpunga. Tamanna KNR-imut sulisunullu kisimi ilungersunarani kalaallinut inuiaqatigiinnut tamallu oqartussaaqataanerannut aamma ilungersunarpoq.
KNR-ip sulisussaaleqineq pissutigalugu nutaarsiassiisarnerminik nutaamik ikiliinini sapaatip akunnerani matumani siusinnerusukkut nalunaarutigereeraalu, danskit tusagassiortuisa peqatigiiffianni siulittaasup, Tine Johansenip KNR-imi pissutsit taama nassuiaatigai.
Ikiliineq pissutigalugu ukiup sinneranut ilanngutassiat ikinnerusut allaaserineqassapput, Qanoruup aallakaatinneqartarnera sivikillineqarpoq, arfinermullu radioaviiseqartarunnaarluni aallakaateqqinneqartumik aallakaatitsisoqartalerpoq.
Tamannalu danskit tusagassiortuisa siulittaasuata isornartorsiorpaa.
- Pitsaasunik tusagassiorfeqarneq tamat oqartussaaqataaneranut pingaaruteqartut ilagaat. Tassa innuttaasut susoqarneranut malinnaatinneqarsinnaapput, inuillu tamat oqartussaaqataanerannut ilaatinneqarsinnaallutik. Tamanna pissutigalugu maannakkut pisut ilungersunarluinnartuusoraakka, taanna oqarpoq.
Pingaartumik nunap annertussusaa pissutigalugu tusagassiornikkut qajannaatsumik tunngaveqartoqarnissaa pingaartuusoq taanna isumaqarpoq.
- Kalaallit Nunaanni innuttaasoqassuseq eqqarsaatigalugu nunaminiarannguuvoq, kisianni avinngarusimangaatsiarpusi. Taamaammat tusagassiorfiit pitsaasuunissaat pingaaruteqarluinnarpoq, taamaattoqarneratigulli inuiaqatigiinni nunarsuarmilu pisunik paasissutissiisoqarnissaa periarfissaavoq. Avinngarusimalluni susoqarnera pillugu paasissutissarsisoqarsinnaavoq.
Ineriartorneq ajorneruleriartuinnassasoq
Nutaarsiassaqartitsivimmi ikilisaaneq kingulleq nutaarsiassaqartitsivimmi kalaallisut oqaasilinnik amigaateqarneq pingaarnertut pissutaavoq.
Assersuutigalugu Radioaviisi arfineq-marlunnik kalaallinik tusagassiortoqartussaavoq, kisianni maannakkut atorfeqartut pingasuinnaapput. Tamatuma saniatigut KNR-ip nutaarsiassaqartitsiviani atorfiit inuttaqanngitsut katillugit maanna arfineq-marluupput.
Sulisussaaleqinerlu nutaarsiassaqartitsinermut aamma tusagassiortunik nutaanik sulisussarsiornermut periarfissanut sunniuteqartoq, Tine Johansen isumaqarpoq.
- KNR-imi atorfeqartut sinneruttut qularnanngitsumik sukkanerusumik arpattussaapput. Nutaarsiassaqartitsineq ikiliiffiunikuummat nutaarsiassiinerat imakinnerussaaq, taanna oqarpoq, nangillunilu:
- Ineriartorneq ajorneruleraluttuinnarsinnaavoq. Sulisut sukkanerusumik arpaqattaartussaanerat pissutaalluni suliarisaat ajornerulissapput, taamaalillunilu sulisunik attassiniarneq ajornakusoornerussalluni.
Takorluugaqannginneq pakatsinartorlu
Naak ajornartorsiutit annertugaluartut aaqqiissutissaqanngilaq.
KNR-ip pisortaata, Annga Lyngep aamma siulersuisut siulittaasuata, Mette Steenholdtip pinasuartumik sulisussaaleqineq qanoq aaqqiissuteqarfigisinnaanerlugu nalullugu sapaatip akunnerata ingerlanerani nalunaarutigaat.
Tamannalu pakatsinartoq, danskit tusagassiortuisa peqatigiiffianni siulittaasoq isumaqarpoq.
- Ataatsimut isigalugu Kalaallit Nunaanni tusagassiornermut atatillugu takorluukkat amigaataasut eqqarsarpunga. Politikkikkut aamma KNR-ip aqutsisuinit. Nutaarsiassaqartitsinermut ikilisaaginnartoqarsinnaanngilaq. Taamaattoqarpat piffissap ingerlanerani nutaarsiassaqartitsineq imakingaarmat pitsaassusaa appassaaq.
Annga Lynge KNR-imi qaammatit marluk sinnilaaginnarlugit pisortaavoq, kisianni ajornartorsiummik ilisimanninnginnerarnissaanut – imaluunniit aaqqiissutissatut siunnersuutissaqannginnissaanut tamanna utoqqatsissutaanngitsoq, Tine Johansen isumaqarpoq.
- Una ajornartorsiut nutaajunngilaq. Piffissap ingerlanerani annertuneruleriartorpoq, kisianni KNR-ip sulisussarsiniarnini sulisunillu attassiniarnini ajornartorsiutigigaa piffissami sivisuumi ilisimaneqarpoq. Taamaattumik ajornartorsiutip qanoq aaqqiiviginiarnissaanut takorluugaqartoqannginnera malinnaaffigalugu pakatsinarpoq, taanna oqarpoq.
Tine Johansenip tamatuma saniatigut Dansk Journalistforbundip nunatsinni tusagassiortut peqatigiiffiat, Tusagassiuinermi Sulisut Peqatigiiffiat (TP) peqatigalugu atugassarititaasut pitsaanerulersinneqarnissaat siunertaralugu Namminersorlutik Oqartussanut arlaleriarlutik noqqaassuteqartarsimasut paasissutissiissutigaa.
