KNR ajornartooqqasoq: Siulersuisut aaqqiissutaasinnaasunik siunnersuutissaqanngillat

KNR-ip nutaarsiassaqartitsivia ajornartuuippoq.

Ajornartoornermi pissutaanerpaamik kalaallisut oqaasilinnik tusagassiortussaaleqineq. Tamanna knr.gl-imi nutaarsiassanik ikinnerusunik saqqummiisalernermik aamma Radioavisit Qanoruullu aallakaatinneqartarnerisa annikillisaavigineqarnerannik kinguneqarpoq.

- Soorunalimi nuanninngilaq, kisianni ullormiit ullormut ajornartorsiut aaqqiinnarneqarsinnaanngilaq. Procesiugami ingarlaartussaq – allanngortitaasinnaasut ingerlaartaramik. Taamaammat soorunalimi ajuusaarnarpoq, kisianni aamma nalunngilluinnarpara ullormiit ullormut aaqqiinnarneqarsinnaanngitsut. Kisianni ajuusaarnaqaaq soorunalimi, KNR-imi siulersuisuni siulittaasoq Mette Steenholdt oqarpoq nangillunilu:

- Qanoq inissisimanerput innersoq misissorneqarpoq suullu suliarineqassanersut maanna paasiniarneqarput.

Annga Lynge pisortatut septembarip aallaaqqaataani atorfinimmat pissutsit ilorraap tungaanut aallarnerunissaat neriulluarfigisineqaraluarpoq.

- KNR pingaarutilinnik nuimasutullu suliassaqarpoq aamma suliffeqarfittut sulisunik annertuunik pikkorissuseqartunik pisariaqartitsivoq aamma sulillunga aallartinnissannut qilanaarpunga KNR-illu inerisarnissaanut atuisunut tamanut iluaqutaasussamik tapersiinissannut, atorfininnermini oqarpoq.

Aaqqiissutissarsi uaneralaarsuunngilaq

KNR pisortartaaramili qaammatit marluk qaangiussimalerput, maannalu nutaarsiassaqartitsivik ajornartoorfiuvoq. KNR-imi pisortaq aperigatsinni aaqqissutissamik siunnersuuteqarnersoq akivoq:

 - Naamik, akissutissaqanngilanga, Annga Lynge oqarpoq. 

Akissulli taanna siulersuisut siulittaasunnut eqqarsajallatsitsinngilaq, paasisinnaaqaami:  

Ilissi siulersuisutut pisussaaffigaarsi, inummik siumut iseqarluni inuttullu misilittagaqarluni KNR-mik kivitsisinnaasumik nassaassallusi. Akisussaaffini naammaginartumik naammassivaa? Imami aperigatsinni akivoq: ”Akissutissaqanngilanga” akissutigaa.

- Paasisinnaaqaara sooq taama akinersoq: ”Akissutissaqanngilanga”, uangami aamma taama akissagaluarama - allaanerulaartumik.  Paasissutissat faktat KNR-imi aqutsisuninngaanniit pisortamililu misissorneqarput. Uku suliassat misissorneqarneri siunissami pilersaarusiornermut tassaniittussaagami. Paasisinnaavara taama akimmat. Ajunngilaq.

Marluullusi taama oqarnersi naammaginarpa? Pingaartumik eqqarsaatigalugu nutaarsiassaqartitsiviup pisussaaffimmik tamakkiisumik naammassisinnaajunnaaqqanera?

- Ullormiit ullormut aaqqiinnarneqarsinnaanngilaq, pingaartumik maannakkorpiaq aaqqiivigisariallit, siornatigulli atuussimasut, Mette Steenholdt oqarpoq.

Ajornartorsiutit allassimasuutigineqareersut

KNR-ip pisortaata, Annga Lyngep oqarnera naapertorlugu aningaasarsiat inissaaleqisitsinerlu ajornartorsiutinut pissutaanerpaanerarneqarput.

-Sulisoqarneq aaqqiiviginiarlugu suliniarnerput nangissavarput, akissarsiakinnerli sulisunullu inissaateqannginneq peqqutigalugit nunatsinniittunik sulisussarsiuminaattoq, KNR-imut oqarpoq.

Kisianiuna ajornartorsiut sulisussarsiornermi iluatsitsisannginnermut tunnganngitsoq.

Nutaarsiassaqartitsiviummi ukiuni marlunni kingullerni tusagasiortut 15-it atorfinitsinnikuuvai. Taakkunannga arfineq-pingasut soraarsimapput.

Sulisut atugarissaarnerannik KNR-ip nammineq misissuisitsinerata siusinnerusukkupisup takutippaa, ajornartorsiutit tassaasut aningaasarsiat aamma atorfininnermi atugassarititaasut.

Sulisut atugarissaanerannik misissuinerit 2017-imili ukiut tamaasa pisartut pisartut – 2018 minillugu – takutippaat aqutsisoqatigiitt aamma sulinermi atukkat assut naammagineqanngitsut.

- Uanga atuuffinnut pitinnanga naluara qanoq sulineq pisarsimanersoq, pitsanngoriaatissat suliniutillu suut aallartinneqarsimanersut nalunarpoq. Taamaammat sulisut suliffimminni atugarissaarnerannik misissuineq MTU-mik taasap inerneri ilumoorutivillugu misissussavakka, siulersuisut siulittaasuat oqaluttuarpoq.

Sulisut sulinerminni atugassarititaasut naammaginninnginnerannik paasissutissat pigeriikkat siulersuisunut naammanngillat.

- Sakkussatut atorluarumaarparput. Kisianni paasissutissat amerlanerussapput. Tusarnaartariaqaratsigit sulisut akerrannikut, soorunalimi, Mette Steenholdt oqarpoq, taamaammat aaqqiinissat tungaannut piffissaq sivisusinnaanerarlugu:

- Sulisunut oqarusuppunga, neriullunga tatiginnissasut, naammagittassasut aamma pitsanngortoqarnissaannut upperinnissasut, Mette Steenholdt oqarpoq nangillunilu.   

- Oqaatigisinnaavara pilersaarusiornermi suliassaq strategi tassaniippoq. Suliassat soorunalimi eqqumaffigineqarnissaat. Pingaartinneqartussat tassaapput sulisut ilorrisimaarnerulernissaat, ineriartornissaat taavalu soorunami suliffimmi atatiinnarnissaat. Suliassaq tassaniippoq, Mette Steenholdt oqarpoq.