KNR nutaanik siulersuisortaartoq
KNR-imi siulersuisut nutaat kiisami inissipput.
Naalakkersuisut tusagassiuutinut nalunaarummi allapput.
Siulersuisut januaarimili toqqarneqartussaagaluarput, tamannali arlaleriarlugu kinguartinneqarluni.
KNR-ip siulersuisuinut ilaasortat tallimat uanilu siulersuisuni siulittaasoq naalakkersuisuniillu ilaasortaq naalakkersuisunit toqqarneqassapput.
Ilaasortat sinneri pingasut Ilisimatusarfiup, eqqumiitsuliortut kulturimillu ingerlatsisut nuna tamakkerlugu kattuffiup aamma KNR-imi aalajangersimasumik atorfillit innersuutaannit naalakkersuisut toqqaassapput.
Siulersuisut ukiuni sisamani atuutissapput. Siulersuisut nutaat 2023-imi januaarip aallaqqaataanit 2026-mi decembarip 31-anut atuutissapput.
Siulersuisut nutaat ima inissipput:
Siulersuisuni siulittaasoq, Mette Steenholdt
Ilaasortaq Juliane Henningsen Heilmann
Ilaasortaq Masaana Egede
Ilaasortaq Miki Jensen
Ilaasortaq Henriette Simonsen
Siulersuisut nutaat KNR-imut pisortassamik nutaamik toqqaassapput. KNR-ip maanna pisortarisaa, Karl-Henrik Simonsen atorfimminit februaarimi soraarniuteqarpoq.
Tamatuma saniatigut siulersuisut nutaat Tusagassiuinermi Sulisut Peqatigiiffiata (TP) KNR-imi sulisut akissarsiaqarnerulernissaannik piumasaqarnerani piffissami atuutilerput.
Kultureqarnermut ataatsimiititaliaq aamma Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Peter Olsen KNR-ip siunissaa pillugu marlunngornermi ataatsimiipput.
Kultureqarnermullu ataatsimiititaliaq isumaqataalluinnarpoq: KNR ajornartooqqavoq ikiorneqartariaqarlunilu.
