KNR-ip pisortaata Karl-Henrik Simonsenip atuuffini qimaleraa
KNR-ip pisortaata, Karl-Henrik Simonsenip KNR-imi pisortatut atuuffik ukiuni arfineq-marlunni atuuffigereerlugu qimalerpaa.
Taanna aggustip 31-ani soraassaaq, Danmarkimullu ilaquttami najugaqarfigisaanut nuussalluni.
- Ilaquttakkalu siornali tassa maannakkuussasoq aalajangereerpugut. Nuliara neriorsornikuugakku angerlarusulerpat malinnikkumaarlunga, Karl-Henrik Simonsen oqarpoq, nangillunilu:
- Maanna piffissanngorpoq. Soraarninngungajalerpunga, nutaanillu siulersuisoqalerneranut atatillugu siulersuisut nutaat KNR-imik ingerlatitseqqissasut isumaqarpunga.
Suliffeqarfik ingerlalluartoq
Karl-Henrik Simonsen nunatsinni innuttaasunut kiffartuussivimmi 2016-imi pisortatut atuutilerpoq.
Karl-Henrik Simonsenip oqarnera naapertorlugu KNR-imi pisortat taamani piffissap sivikitsup ingerlanerani nikerarput aningaasaqarnerliorlunilu.
KNR-ili maanna qimaligaa qanoq ittuunersoq aperineqarami ima akissuteqarpoq:
- Atuivallaassaarluta, aningaasanik aqutsineq ingerlalluarpoq, sulisut aqutsisullu inuusukaarsuarnik piukkunnarluinnartunik taarsersornikuupput, suliffigissaanikuuvugut. Soorunami apuutinngilagut. Kisianni suliffeqarfik tamaat isigissagaani oqarsinnaavugut immaqa umiarsuaq immattorujussuaq tikinnikuullugu massakkut puttallaarissorujussuaq aammalu sammivilik qimassallugu.
Nutaarsiassaqartitsivimmi sulisussaaleqisut
KNR-ip nutaarsiassaqartitsivia siorna apriilimili sulisussaaleqilerpoq, pingaartumillu tusagassiortut kalaallisut oqaaseqartut ussagartinniarnerat ajornakusoorluni. Tamanna pissutigalugu radioaviisip aallakaatinneqartarnera sivikillinikuullunilu ikilineqarnikuupput.
Karl-Henrik Simonsenilli sulisussaaleqineq pisortatut atuuffimminit soraalerneranut sunniuteqanngitsoq nassuiaatigaa.
- Soorunami uggornarpoq taakku aaqqissinnaannginnakkit, imaluunniit aaqqissimannginnakkit. Kisianni tassa marloqiusaavoq, tassa ineqarniarneq aammalu akissarsiat, taakku uanga allanngortissinnaanngilakka. Soorunami suliffitsinnut piginnittutsinnut taakkua apuuttarpagut siulersuisut aqqutigalugit.
Karl-Henrik Simonsenip oqarnera naapertorlugu sulisussaaleqinerup ajornartorsiutaanera pingaartumik tusagassiortut isumaqatigiissutaannik aamma nunatsinni kalaallit tusagassiortutut ilinniarsimasut amigaataanerannik pissuteqarpoq.
Taamaammat tusagassiortut peqatigiiffiat Naalakkersuisullu annertuumik suliassaqartut isumaqarpoq.
- Naalakkersuisut nunatsinni tusagassiorfik qanoq atorniarlugu aalajangissavaat. Tamat oqartussaaqataanerat innuttaasunut kiffartuussiveqartinnagu imaluunniit nalinginnaasumik tusagassiorfeqartinnagu ingerlanneqarsinnaanngilaq, taamaammat aamma politikerit siunissami ukkatarinninnerussasoraakka, Karl-Henrik Simonsen oqarpoq.
