Kultureqarnermut ataatsimiititaliaq aalajangersumik oqarpoq: KNR nukittorsartariaqarpoq

Kultureqarnermut ataatsimiititaliaq isumaqataavoq:  KNR ajornakusooqqavoq ikiorneqassallunilu.

Kultureqarnermut, ilinniartitaanermut, ilisimatusarnermut ilageeqarnermullu ataatsimiititaliap siulittaasua, Doris J. Jensen tusagassiuutinut nalunaarummi allappoq.

Tusagassiortunik kalaallinik sulisorinniinnarniarnermik sulisussarsiortarnermillu unammilligassat KNR-imit misigineqartut tigussaasumik aaqqiivigineqartariaqartut ataatsimiititaliaq isumaqatigiittoq isumaqarpoq takkulu Naalakkersuisut, Inatsisartut, KNR-ip aammalu tassani sulisut kattuffii siammasissumik suleqatigiinnerisigut aaqqiivigineqassapput, taanna allappoq.

Taamaammat ataatsimiititaliap ilinniartitaanermut, kultureqarnermut, timersornermut ilageeqarnermullu naalakkersuisoq, Peter Olsen, KNR-ip siunissaa pillugu marlunngornermi ataatsimiigiaqquneqarpoq.

- Ataatsimiinneq paasisaqarfiuvoq aammalu Ilinniartitaanermut, Kultureqarnermut, Timersornermut Ilageeqarnermullu Naalakkersuisup suleqatigiinnissamik kissaateqarnerminik Inatsisartut ataatsimiititaliaat isaassivigaa, Doris J. Jensen oqarpoq.

Ataatsimiititaliap iliuuseqartoqarnissaa qulakkeerniarlugu Peter Olsenip isaaffiviginninnera malitseqartitsiffigiumaarlugu oqaatigaa.

Naalakkersuisunut kaammattuuteqarneq

Kultureqarnermut ataatsimiititaliattaaq Naalakkersuisut suleqatigiissitamik KNR-ip unammillernartitaanut ajornartorsiutaanullu aaqqiissutissarsiortussamik pilersitsinissaat kaammattuutigaa.

Peter Olsenimmi suleqatigiissitamik taama ittumik pilersitsinissani Suliaqaqatigiit atuagassiaannut Journalistenimut 2022-mi juunimi neriorsuutiginikuuaa.

Maannali qaammatit qulingiluat qaangiuttut neriorsuutini suli eqquutsinngilaa.

Politikerip iliuuseqarnissaata amigaataanera pissutigalugu Tusagassiuinermi Sulisut Peqatigiiffiata siulittaasuata, Oline Olsenip Peter Olsen ammasumik allagaqarfigalugu pissutsit pillugit KNR-imilu akissarsiat pillugit isornartorsiorpaa.

Taannali kultureqarnermut naalakkersuisutut KNR-ip nutaarsiassaqartitsiviani tusagassiortunut akissarsiatigut atugassarititaasunut politikkikkut akuliussinnaanani isumaqarpoq.

Sulinermik Inuussutissarsiuteqartut Kattuffiatali siulittaasuata, Jess G. Berthelsenip tamanna isumaqatiginagu Peter Olsen akuliunnissaminut periarfissaqarluinnartoq nassuiaatigaa.

Qaammatit qulingiluat ikioqqusut

KNR-imi akissarsiat appasinnerat pissutigalugu amerlasuut soraarniuteqarnerannik nutaarsiassaqartitsivimmilu taarseraattoqarneranik kinguneqarpoq.

- Inuit isumaqatigiissummut assingusumut allami attaveqaqatigiinnermi sulisutut atorfimmik nassaarsinnaagunik, taamatullu ukiumut 36.000 koruuninik akissarsiaqarnerusinnaagunik uagut sulisunik atorfinikkusuttunut pilerisaarinissatsinnut piffissap sivisunera tupinnanngilaq, KNR-ip pisortaa, Karl-Henrik Simonsen oqarpoq.

KNR 2022-mi apriilimili sulisussaaleqineq pissutigalugu radioaviisip sivisussusaanik ikilisaallunilu sivikillisaasariaqarsimavoq.