Neriorsuuteqarnerminiit qaammatit qulingiluat kingorna: KNR-imut suli suleqatigiissitaliunngitsoq

Ilinniartitaanermut, Kultureqarnermut Timersornermut Ilageeqarnermullu Naalakkersuisup Inuit Ataqatigiinneersup, Peter Olsenip, Tusagassiuinermi Sulisut Peqatigiifiannit (TP) allagarsiani ammasut akivai.

KNR-ip nutaarsiassaqartitsiviata kalaallinik sivitsortumik tusagassiortussaalatsinera pillugu politikkikkut iluarsiissutaasinnaasunik nassaarniartoqartariaqalertoq, TP-p siulittaasua Oline Olsen naalakkersuisunut isornartorsiuilluni sapaatit akunnerata siuliani ammasumik allagaqarpoq.

Peter Olsenip TP-mit allagarsiani ammasuugaluartut akissutini tamanut saqqummiukkusunngilaa, akissutaali KNR-ip TP aqqutigalugu pissarsiaraa.

KNR-ip siunissaanik misissuiffiusartussamik aaqqiissutissanillu siunnersuuteqarfiusartussamik sooq suli suleqatigiissitaliorsimannginnerluni, Peter Olsen akissummini nassuiaavoq. KNR-imut suleqatigiissitaliorniarluni, taanna suliaqaqatigiit atuagassiaannut, Journalistenimut, 2022-imi juunimi neriorsuivoq.

- Naalakkersuisoqarfimmi sulisussaalatsineq piffissaalatsitsinerlu KNR-imut suli suleqatigiissitaliunnginninnut peqqutaanerpaapput, Peter Olsen TP-mut akissummini ilaatigut allappoq.

KNR-ip kalaallinik tusagassiortussaalatsinera peqqutaalluni radioaviisi sivikillineqartariaqarlunilu akuttorneqartariaqarsimavoq. KNR-imilu tusagassiortut amigaraluarlutik innuttaasunut sullissisussaatitaaffeqarnertik peqqutigalugu ulapaaqisut, Oline Olsenip aamma oqaatigaa.

Siulersuisut nutaat

 KNR-ip pisortaa, Karl-Henrik Simonsen, soraarniarluni februaarimi nalunaartoq, kultureqarnermut naalakkersuisoqarfillu KNR-imi siulersuisunik nutaanik toqqaanissamut 2022-mi aggustimili oqaloqatigiissuteqarlutik pilersaarusioqatigiilerput. KNR nammineq aallartitassaminik siorna oktobarimi toqqaavoq. Siulersuisullu nutaat Peter Olsenip januaarimi saqqummiuttussaagaluarpai, sulili taamaaliornani.

- Arriippallaarujussuarpoq, iluamik tiguneqartutut misigisimanngilagut, Karl-Henrik Simonsen KNR-imut siusinnerusukkut oqarpoq.

Peter Olsen TP-mut akissummini allappoq:

- Siulersuisunik nutaanik piffissami qaninnerpaami toqqaasoqarnissaa naatsorsuutigineqartoq naggasiutigalugu oqaatigisinnaavara.

KNR-ip naalakkersuisoq, Peter Olsen suleqatigiissitamik qaqugu pilersitsiniarnersoq apererusukkaluarpaa, tamannali periarfissaanngilaq. Peter Olsenip apersorneqarnissani piffissaqarfiginagu paasissutissiissutigaa.

Tamatuma saniatigut nammineq TP-llu iluminni oqaloqatigiittoqarnissaa kissaatigaa.