Demokraatit KNR-imi sulisussaaleqineq pillugu: Nunatsinnik aqutsinermi pikkorliornerujussuuvoq

Illuatungiliuttut partiivisa Demokraatit Atassutillu KNR-imi kalaallisut oqaasilinnik tusagassiortussaaleqinera tamat oqartussaaqataanerannut ajornartorsiutaasoraat tusagassiortullu akissarsiaqarnerusariaqarsoralugit.

- KNR ima ajornartorsiortigivoq, tusagassiissutit annikillisittariaqarlugit, sulisussaqannginneq pissutigalugu. Isumaqarpunga ajornartorsiut angisoorujussuusoq aammali inuiaqatigiit ingerlaasiannut innarleerujussuassasoq. Tusagassiortunut taama amigaataatiginerat pissutigalugu taakkununnga atugassarititaasut oqaluuserinissaat pingaaruteqartoq isumaqarpunga, Demokraatit siulittaasuata tullersortaa kulturimullu tunngasunik oqaaseqartartuat, Nivi Olsen oqarpoq.

Atassutip siulittaasua, Aqqalu Jerimiassen isumaqataavoq.

- Inuiaqatigiit kiffaanngissusaannut tamallu oqartussaaneranut ajornartorsiuterujussuuvoq, taanna oqarpoq.

Tusagassiuinermi sulisut peqatigiiffiata (TP) siulittaasuata Oline Olsenip ilinniartitaanermut, kultureqarnermut, timersornermut ilageeqarnermullu naalakkersuisumut Inuit Ataqatigiinneersumut, Peter Olsenimut ammasumik allagaqarnerata kingorna taama qisuariaateqartoqarpoq.

Taassuma naalakkersuisoq KNR-ip siorna apriilimili kalaallisut oqaasilinnik tusagassiortussaaleqilernerata kingornali politikkikkut iliuuseqartoqannginnera pillugu isornartorsiorpaa. Tusagassiortussaaleqineq pissutigalugu radioaviisimik aallakaatitsinerit naannerulerlutillu ikinnerulerput.

Akissarsiat annikippallaartut

Oline Olsenip KNR-imi akissarsiassarititaasut pisortat suliffeqarfiini atorfinni akissarsianut unammillersinnaannginnerat tamannalu pissutigalugu tusagassiortunik kalaallisut oqaasilinnik amigaateqartoqarnera allakkamini allappaa.

Naalakkersuisut tamanna tusaaniartariaqaraat Nivi Olsen isumaqarpoq.

- Isumaqarpunga akissarsiat appasippallaartut. Nalunngilara isumaqatigiinniarnerni politikkikkut akuliuteqqusaanngitsut, kisianni ajornartorsiutip taama annertutiginerani politikkikkut oqaaseqartoqartariaqarpoq, taanna oqarpoq.

KNR-imi tusagassiortumut ilinniakkamik naammasseqqammersumut qaammammut tunngaviusumik akissarsiat 25.000 koruunit missaanniipput.

KNR-ip pisortaata, Karl-Henrik Simonsenip atorfimminit qanittumi soraarniuteqartup akissarsiaqartitsineq kalaallinik tusagassiortunik sulisussarsiornermut aamma ajornartorsiutaanerpaasoraa.

- Inuit isumaqatigiissummut assingusumut allami attaveqaqatigiinnermi sulisutut atorfimmik nassaarsinnaagunik, taamatullu ukiumut 36.000 koruuninik akissarsiaqarnerusinnaagunik uagut sulisunik atorfinikkusuttunut pilerisaarinissatsinnut piffissap sivisunera tupinnanngilaq, Karl-Henrik Simonsen oqarpoq.

Suleqatigiissitaq

Naalakkersuisoq, Peter Olsen KNR-imi sulisussaaleqineq pillugu suliaqaqatigiit atuagassiaannit, Journalistenimit 2022-mi juunimi aperineqarami suleqatigiissitamik, KNR-ip siunissaanik misissuisussamik aaqqiissutissanillu siunnersuuteqartussamik, pilersitsinissani neriorsuutigaa.

TP-p siulittaasua KNR-illu pisortaa suleqatigiissitaq pillugu suliamut tunngatillugu allamik tusagaqaqqissimanngillat.

- Naalakkersuisup suleqatigiissitamik pilersitsinissamik oqarnissaa ukiullu ataatsip qaangiunnerani puiguisimanissaa ajornanngippallaarpoq, Nivi Olsen oqarpoq.

Atassutip siulittaasuata suleqatigiissitaq aamma amigaatigaa.

- Neriorsuutigisimagunik taava eqquutsissavaa. Tamanna eqquutsinngikkuniuk tamanna neriorsuinermik unioqqutitsineruvoq, taanna oqarpoq.

Siulersuisut nutaat

Naalakkersuisut KNR-imut siulersuisunik nutaanik januaarip aallaqqaataani piareersimasussaagaluarput, maannali qaammatit marluk qaangiuttut suli nutaanik siulersuisoqalinngilaq.

- Arriippallaarujussuarpoq, iluamik tiguneqartutut misigisimanngilagut, Karl-Henrik Simonsen KNR-imut siusinnerusukkut oqarpoq.

Nivi Olsenip sooq suli siulersuisoqalersimannginnera aamma paasiuminaatsippaa:

- Assorujussuaq uggornarpoq, aamma takutiinnarpaa naalakkersuinikkut qanoq suleriuseq ingerlanneqarnersoq. Taamatut oqarusunngikkaluarpunga kisianni pikkorliornerujussuuvoq uanga isinninngaanniit, taanna oqarpoq, nangillunilu:

- Naalakkersuisut aamma neriorsuutaat eqqaamasariaqarparput ammasuunissaq, inuiaqatigiinni ammanerunissaq. Ammasuunissamik allamillu oqalussagaanni isumaqarpunga timitalersuineq tassuuna aamma ingerlanneqartariaqaraluartoq.

Tusagassiortussaaleqineq tusagassiornermik ilinniarsimasut tusagassiortutut sulerusunnginneranik aamma pissuteqarsinnaanngila?

- Taamaassorinngilara. Tusagassiortunngorniarnermik ilinniarsimagaanni taava tusagassiortunngornissaq tusagassiornissarlu soqutigilluinnarneqarsimassaaq. KNR sulinermi pitsaasunik atugassaqartitsiguni taava isumaqarpunga tusagassiortut tassani sulerusussasut, Nivi Olsen oqarpoq.

KNR-ip Peter Olsen apersorniarsarigaluarpaa, taannali piffissaqarani paasissutissiivoq.