Tusagassiuinermi sulisut peqatigiiffiata KNR ernumassutigigaa: Politikkikkut iluarsiissutaasinnaasunik nassaarniartoqartariaqalerpoq

KNR-ip nutaarsiassaqartitsiviani kalaallinik tusagassiortunik sulisussaaleqineq, Tusagassiuinermi Sulisut Peqatigiiffiata (TP) siulittaasuata, Oline Olsenip ernumanarluinnartuusoraa. Taanna Ilinniartitaanermut, Kulturimut, Timersornermut Ilageeqarnermullu Naalakkersuisumut, Peter Olsenimut (IA) ammasumik allagaqarluni oqarpoq.

- Nutaarsiassaqartitsivimmi kalaallinik tusagassiortussaaleqineq nutaajunngilaq, amigaataanerallu sivisuumik ajorsiartuinnarsimasoq ilisimaneqarpoq, Oline Olsen allappoq.

KNR-ip nutaarsiassaqartitsiviani siorna apriilimili sulisussaaleqisoqalerpoq, pingaartumillu kalaallisut oqaasilinnik sulisussarsiorneq ajornartorsiutaanerulluni. Tamanna pissutigalugu radioaviisip aallakaatinneqartarnera sivikillineqarlunilu ikilineqarnikuupput.

- Maanna ima ilungersunartigisumik killiffeqalerpoq pissutsit politikkikkut paasineqartariaqalerlutik, 2024-milu akissarsiat pillugit isumaqatigiinniartoqarnissaata tungaanut iluarsiissutaasinnaasunik nassaarniartoqartariaqalerluni, Oline Olsen oqarpoq.

Akissarsiat ajornartorsiutaasut

Oline Olsenip KNR-ip akissarsiat pisortat suliffeqarfiini allani akissarsianut unammillissutigisinnaanngikkai tamannalu pissutigalugu KNR-imi kalaallit tusagassiortut amigaataasut allakkamini oqaatigaa.

- Akissarsiat appasinnerat kikkut tamanut kingunerluppoq, soorlu aamma inuinnaat naalakkersueqataanerat, demokratii, taamaalilluni innarneqartoq. KNR-imi tusagassiortut piaartumik amerlineqassappata akissarsiat qaffanneqarnissaat sulissutigineqartariaqarpoq, taanna oqarpoq.

KNR-ip pisortaata, Karl-Henrik Simonsenip atorfimminit qanittumi soraarniuteqartup akissarsiaqartitsineq kalaallinik tusagassiortunik sulisussarsiornermut aamma ajornartorsiutaanerpaasoraa.

- Inuit isumaqatigiissummut assingusumut allami attaveqaqatigiinnermi sulisutut atorfimmik nassaarsinnaagunik, taamatullu ukiumut 36.000 koruuninik akissarsiaqarnerusinnaagunik uagut sulisunik atorfinikkusuttunut pilerisaarinissatsinnut piffissap sivisunera tupinnanngilaq, Karl-Henrik Simonsen oqarpoq.

Tamatuma saniatigut KNR-ip atorfinnut inuttassarsiuunneqartunut inissaqartitsiniarnissani ajornartorsiutigigaa, taamaammallu atorfimmik inuttassarsiuunneqartumik saqqummersitsinermit tusagassiortumik atorfinitsitsinissamut suliaq sivisoorujussuusarnerarpaa.

Nutaarsiassaqartitsivimmi atorfiit pingasut maanna inuttassarsiuunneqarput: tusagassiortut marluk aaqqissuisorlu. Atorfiit pingasut tamarmik inissaqartitsipput.

Allamilli ajornartorsiuteqartoq, Karl-Henrik Simonsen nassuiaavoq.

- Piukkunnartunik sulisussarsinissaq pisariaqarpoq. Nutaarsiassaqartitsivimmi pikkorissunik ilinniarluarsimasunillu tusagassiortoqartariaqarpoq, taakkulu ikeqimmata pilerisaarniarnerat ajornakusoorpoq, taanna oqarpoq.

KNR-imut suleqatigiissitaq

Naalakkersuisup, Peter Olsenip suleqatigiissitamik, KNR-ip siunissaanik misissuisussamik aaqqiissutissanillu siunnersuuteqartussamik pilersitsinissani suliaqaqatigiit atuagassiaannut, Journalistenimut 2022-mi juunimi neriorsuutigaa.

TP-p siulittaasua suleqatigiissitaq pillugu tusagaqaqqissimanngilaq. Taamaammat taassuma allagaa Peter Olsenimut sammivoq, tassanilu taassuma suliaq sumut killinneraa apeqqutigaa.

KNR-ip pisortaa suleqatigiissitamik suliaqarnermut allamik aamma tusagaqarsimanngilaq.

KNR-imi pisortatut suleqatigiissitamik matumanik aallartitsisoqarnissaanut suliaqarnerusinnaagaluarpit?

- Iliuuseqatitsiniaannavippugut. Ilaatigut naalakkersuisoqarfik KNR-imi siulersuisunik nutaanik toqqaanissamut oqaloqatigiissuteqarfiginikuuagut. Naalakkersuisoqarfillu aggustimi pilersaarusioqatigiilerpugut. Nammineq aallartitassatsinnik oktobarimi toqqaavugut, siulersuisullu januaarimi piareertussaallutik. Maanna februaarip naaneraniippugut suli nutaanik siulersuisoqalinngilaq, Karl-Henrik Simonsen oqarpoq, nangillunilu:

- Arriippallaarujussuarpoq, iluamik tiguneqartutut misigisimanngilagut.

KNR-ip Peter Olsen oqaaseqartinniarsaraa.