IA: KNR-ip annikillisaanera innuttaasut oqartussaaqataanerannut ilungersunarpoq

Naalakkersuisut KNR-imi ajornartorsiutaasut sorpiaanersut misissortariaqarpaat.

KNR nutaarsiassaqartitsiviani tusagassiortussaaleqineq pissutigalugu nutaarsiassanik pilersuinermi annikillisaanerarmat, Inuit Ataqatigiit Inatsisartuni ilaasortaatitaannit taama qisuariarput.

KNR-ip nutaarsiassaqartitsiviani tusagassiortut tallimararterutaat, unammillernartunik nutaanik misileerusunneq nutaamillu suliffittaarneq peqqutigalugit suliffimminnit piffissami kingullermi soraarput.

Tamanna KNR-mi nutaarsiassaqartitsiviani ullaakkut qulingiluanut radioaviisertoqartarunnaarneranik ullup qeqqanullu radioaviisip oqaatsini marlunni immikkut minutsinik 15-inik sivissuseqaraluartup kalaallisut minutsinik aqqaneq-marlunnik danskisullu minutsinik qulinik sivissuseqaannalerneranik kinguneqarpoq.

Sivikilliinermi Qanoruup sivikinnerusumik aallakaatinneqartalerneranik aamma kinguneqarpoq, tamatumalu saniatigut knr.gl-imi nutaarsiassat ikinnerulersinneqarlutik.

- Kajumissaarivugut naalakkersuisunut, pissutsit taamaalisimanerat ilungersunartoq, arlaatigut sammeqqullugu, ajornartorsiutillu sorpiaanersut misissoqqullugit iliuuserineqarsinnaasunillu isumaliuteqaqqullugit, Inuit Ataqatigiit Inatsisartuni gruppiat sinnerlugu, Mariia Simonsen taama oqariartuuteqarpoq.

Taanna nammineq tusagassiortutut ilinniarsimasuuvoq,Inatsisartunullu ukiup ataatsip matuma siorna qinigaannginnermini Ilisimatusarfimmi tusagassiortunngorniarfimmi ilaatigut ilinniartitsisuusarsimalluni.

Akissarsiat maalaarutigisaraat

Tusagassiortut KNR-ip Nutaarsiassaqartitsiviani soraarnissartik oqaatigigaangamikku aningaasarsiat sammigajukkaat, nutaarsiassaqartitsiviup pisortaata, Alice Sørensenip oqaatigaa.

- Soraartut oqaloqatigisarpagut, tamangajavimmillu akissarsiat assersuutigalugu paasissutissiisartutut atorfeqarnermut imaluunniit Naalakkersuisuni ilaasortamut allattaanermut sanilliullugit annikippallaarnerat oqaatigisarpaat.

AAMMA ATUARUK KNR-imi Nutaarsiassaqartitsivik upernaamut sivikilliillunilu ikilisaasoq

Taamatullumi killiffeqarneq attakkuminaatsuusoq, Mariia Simonsen oqarpoq:

- Innuttaasut oqartussaaqataanerannut tunngasorujussuummat ilungersunaraarput, tusagassiorfik nunatsinni innuttaasunut kiffartuussisutuaq, ilaatigut Namminersorlutik Oqartussat iluanni akissarsiat tungaatigut unammilleqatigiinneq pisuulluni inuttamigut ilungersunartorsiortinneqarmat.

TP soraartut paasisinnaagai

Tusagassiortut Peqatigiiffiata KNR-ip tusagassiortunut akissarsiaqarnissamut neqeroorutigisartagaa pisortat suliffeqarfiutaasa akissarsiaqartitsisarnerannit annikinnerunerannik oqartoqarnera ilisarisinnaavaa:

- Ajornartorsiutaasoq ilisarisinnaavara. Tusagassiortut suliffimmit ulapaarfimmik arlalinnik angumeriniagassartaqartumit akissarsiallu annikinneruffigisaanit allanik unammillernartunik ujartuinerat paasisinnaalluarpara, Tusagassiortut Peqatigiiffianni siulittaasuusimasoq, Nina-Vivi Andersen KNR-imut oqarpoq.

Naalakkersuisut tusagassiuuteqarneq pillugu nalunaarusiaq siulleq ukiut aqqanillit matuma siorna 2011-mi saqqummiuppaat. Taamani nunatsinni nutaarsiassaqartitsiviit aningaasakilliorneq ilaatigut peqqutigalugu pisussaaffitsik tamakkerlugu sulinngitsut tassani tikkuarneqarpoq. Tusagassiuutit aningaasakilliornerat peqqutigalugu tamat oqartussaaqataanerat innarlerneqartoq nalunaarusiami aamma tikkuarneqarpoq.

Tamanna ukiut aqqanillit matuma siorna pivoq – Naalakkersuisut nunatsinni tusagassiorfinni pissutsit pillugit nutaamik qulaajaassasut, Mariia Simonsen (IA) isumaqarpoq.

Tusagassiuutinilu atukkanik nutaamik qulaajaasoqarnissaanik kissaateqarneq parteeqataanit, kulturimut naalakkersuisumit, Peter Olsenimit tigulluarneqarpoq.

- Isumaqarpunga kaammattuutaasoq ajunngilluinnarlunilu pissusissamisoortuusoq. Taamaattumik nalunaarusiortitsisinnaanissaq isumassarsialatsialattut suliassatullu tigorusuppara.