KNR-imi Nutaarsiassaqartitsivik upernaamut sivikilliillunilu ikilisaasoq

KNR-ip nutaarsiassaqartitsivianit tusagassiortut arlalissuit pisarnermit amerlanerit upernaap ingerlanerani piffissami sivikitsumi soraarniuteqarlutik allamik suliffittaarput.

Tamanna Qanoruup sivikinnerulerneranik, nittartakkami KNR.gl-imi allaaaserisat ikinnerulernerannik radioviisillu ikilillutillu sivikillinerannik kinguneqassaaq.

Nutaarsiassat ikinnerulernerat ullumi apriilip ulluisa 19-ianni marlunngornermiit malugineqarsinnaaleriissaaq.

- Pisortat suliffeqarfiutaanni namminersorlutillu oqartussat suliffeqarfiutaanni akissarsiagissaarnarnerummat tusagassiortut taakkunani atorfittaajortorput. Tamannalu KNR-imut unammillernarpoq, nutaarsiassaqartitsivimmi pisortaq Alice Sørensen oqarpoq.

Atorfiit 20 procentiisa inuttalernissaat amigaataasoq

Tusagassiortut atorfimminnit soraarneri ilutigalugit atorfinititsiniarneq innuttaasunut kiffarttussivimmut ajornakusoorpoq.

- Ukiut ingerlanerini tusagassiortut allatulli suliffinnik allanik misilittaarusullutik ingerlaqqittarnerat nalinginnaasuuvoq. Taamali amerlatigisut ataatsikkut inuttalerniarnerat ajornakusoorpoq. Immikkoortortaqarfimmi atorfiit tusagassiortunik ilinniarsimasumik inuttalerneqanngitsut 20 procentii maanna inuttassarsiuuppagut.

Taassuma tusagassiortut kalaallisut oqalussinnaasut annermik amigaataasut oqaatigaa.

- Assersuutigalugu radioaviisimi tusagassiortutut kalaallisut oqaluttunut atorfiit inuttalerneqartussat, apriilip 15-ata tungaanut qinnuteqarfigineqarsinnaasut, suli qinnuteqarfigineqanngillat. Akerlianik danskisut oqaasilimmik tusagassiortussarsioratta 16-it qinnuteqarput.

Pissutsillu taamaannerat immikkoortortaqarfiup saqqummiussassanik annikillisaagallarnissaanik kinguneqarpoq.

- Suliagut angumerisinnaasatsinnut naleqqussaratariaqarpavut. Taama ikitsigitilluta tamakkiisumik sulisoqartutut suliaqartarsinnaanngilagut.

Akissarsiat annikippallaartut

Tamannalu ulluinnarni radioaviisit qulingiluanut aallakaatinneqassaarallarnerannik, ullo'qeqqanullu radioaviisit immikkut 15 minutsiujunnaarlutik kalaallisut 12 minutsinik danskisullu ti minutsinik sivisussuseqalernerannik kinguneqassaaq.

Nutaarsiassanik ikilisaagallarnerup kingunerisassaasa ilaat alla tassaaavoq Qanoruup sivikinnerulernera, soorlu aamma nittartakkami knr.gl-imi allaaserisat ikinnerulertussaasut.

- Qanoruumi tusagassiortutut atorfiit marluk sivitsortumi inuttaqanngillat. Taamaakkaluartut ullut amerlarpaartaanni pisarnitsitut 20 minutsit ullormut tv-kkut nutaarsiassiisarpugut. Tamannalu sivisunerusumik attakkuminaappoq. Sulisummi feriartussapput, pikkorissartussaapput, meerartaarnerminni sulinngiffeqartussaapput allatullu aamma napparsimasarlutik. taamaammat ullut tamaasa 20 minutsit nutaarsiassiiniarneq ajornakusoorpoq, Alice Sørensen oqarpoq.

Taassuma tusagassiortut nutaarsiassaqartitsivimmit soraarniuteqarnerminni akissarsikippallaarneq amerlasuutigut tunngavilersuutigisaraat tikkuarpaa.

- Soraartut oqaloqatigisarpagut, tamangajavimmillu akissarsiat assersuutigalugu paasissutissiisartutut atorfeqarnermut imaluunniit Naalakkersuisuni ilaasortamut allattaanermut sanilliullugit annikippallaarnerat oqaatigisarpaat. Piffissami kingullermi atorfininnissamik soqutiginnittut arlallit akissarsiat ikigalugit atorfinikkusukkunnaartut oqaloqatigaavut. Kisianni tassa akissarsianut isumaqatigiissut atuuttoq malillugu atorfinititsisarpugut.