KNR-ip ajornartorsiornerani: Siulersuisuni siulittaasoq tunuarpoq
Mette Steenholdt KNR-imi siulersuisuni siulittaasooreerluni tunuarpoq.
Tunuarnini pillugu Mette LinkedIn-imi quppernermini allappoq
-Misilittakkat ataatsimik annertusiallapput. Sivisuumik eqqarsaatigilluareerlugulu, KNR-imi siulersuisut siulittaasuattut tunuarnissara, februaarip aallaqqaataa 2024-imi pissasoq aaliangerpara. Ukioq ilikkagaqarfiusimaqaaq, unammillernartut paasisallu assigiinngitsut soqutiginartut pipput. KNR-ip sulisuilu ajunnginnerpaamik kissaappakka, Mette allappoq.
Mette Steenholdt januaarip aallaqqaataani, 2023-imi siulersuisut siulittaasorilerpaat, taamaalillunilu qaammatit 13-it siulersuisuni siulittaasuusimavoq.
Mette Steenholdtip tunuarnini pillugu, KNR-ip oqaaseqartinnissaa suliniutigivaa.
Ajutooqqalluinnartoqarpoq
KNR-ip siulersuini siulittaasua KNR-ip nutaarsiassaqarnermut immikkoortortaani, sulisoqarnermigut ajornartorsiornerata nalaani tunuarpoq.
KNR-ip kalaallinik tusagassiortussarsiniarnerata ajornartorsiutaajuarnera pissutigalugu ukioq nutaarsiassat ikilisinneqaqqanerata sivitsoqqinneqarneranik aallartippoq.
Radioaviisimi kalaallit tusagassiortut tallimat amigaatigineqarput, maannakkullu aalajangersimasumik atorfeqartut marluinnaallutik.
Ilaatigullu KNR-imi nutaarsiassaqartitsivimmi aaqqissuisuuneq, ukiortaaalersoq soraarniuteqarnikuuvoq.
Sapaatip akunnerata siuliani Tusagassiuinermi Sulisut Peqatigiiffiat, TP qisuariaateqarpoq. Peqatigiiffik tusagassiuutinut nalunaaruteqarnermini naalakkersuisunut isornartorsiuivoq.
- Nunatsinni isorartoqisumi innuttaasut nutaarsiassanik suliarilluakkanik apeqqusiisinnaassusilinnillu ulluinnarsiuteqartussaagaluartut eqqugaapput. Inuiaqatigiinni pissaanerit sisamaattut taaneqartartoq nukillaaraluttuinnarpoq, KNR-illu inuiaqatigiinnut pisussaaffini kivissinnaajunnaarpaa, TP allappoq.
