Toqutsinermi agguisoqarnera pillugu suliaq novembarimi ulluni sisamani eqqartuussissutigineqassaaq

Ukioq ataatsip missaata matuma siorna inuup timaata ilaa Ilulissani eqqavissuarmi nassaarineqarpoq.

Inuup timaata ilaa sulisumik nassaarineqarpoq, taannalu eqqagassat ikuallanneqartussat akornanni nassaarineqarpoq.

Taamani angut 28-nik ukiulik pasineqarpoq – suliamilu eqqartuussisoqarnissaanut maanna ulluliisoqarpoq. Ilulissani Eqqartuussisoqarfik Qaasuitsumi ulluni sisamanit ikinnerunngitsuni eqqartuussisoqarnissaanut ulluliisoqarpoq.

AAMMA ATUARUK Politiit Ilulissani toqutsinermik misissueqqissaarnertik naammassigaat

Nunatsinni Politiit unnerluusisussaatitaasuata, Marutha Thayapharanip unnerluussisussaatitaasut novembarip sapaatip akunnerani 47-mi Ilulissani eqqartuussisoqarnissaanut ulluliisoqarnissaa naatsorsuutigigaat KNR-imut septembarimi oqaatigaa.

Maannalu novembarip ulluisa 21-annit 24-anut ulluliisoqarpoq.

Timip ilaanik ullut arlallit ingerlaneranni nassaartoqaqqittoq

Timip ilaanik Ilulissani eqqaavissuarmi siorna oktobarip ulluisa aappaani arfininngornermi nassaartoqarpoq.

Ullut pingasut qaangiunnerani timip ilaanik allamik nassaartoqaqqippoq.

Politiit qatserisartullu ikuallaavimmi takussutissanik ulluni arlalinni misissueqqissaarput.

Suliaq peqqarniitsumik aallaaveqarmat Kalaallit Nunaanni Politiit Danmarkimut ikiortissarsiorput. Pinerluttoqarsimatillugu toqusunillu misissuisartut Ilulissanut toqunneqarsimasup kinaaneranik qanorlu toqusimaneranik misissuiartorput.

Angutillu politiinit tigummigallarneqartup saniatigut inuit allat marluk aamma tigusarineqarput.

Taakkunannga ataaseq tigusarineqarnermi aqaguani iperagaavoq. Allalu – arnaq – ulluni pingasuinnarni tigummigallarneqariarluni iperagaavoq.