Toqunartutalimmik navialisimasunut siunnersuisarfimmi nakorsaaneq: Taama pisoqaqqinnginnissaanut ima iliussaagut
Meeqqat pingasut erruivimmut qaqorsaammik imigaqarnermi kingorna napparsimmavimmut unitsinneqarput.
Tamanna angajoqqaanut sinnattupiloorpalussinnaavoq, tamannali Sisimiuni ilaqutariinnut pingasunut ataasinngormat piviusuuvoq. Meeqqat pingasut meeqqerivimmi Uiami maskinamut erruivimmut qaqorsaammik imerpalasumik seernassuseqangaatsiartumillu imigaqartoorput.
Aatsaalli ajoraluartumik taama pisoqanngilaq. Københavnimi Bispebjergimi toqunartutalinnik navialisimasunut siunnersuisarfimmi nakorsaaneq, Anja Julie Huusom oqarpoq.
- Allaasorinnilluni taama paarlaassisoortoqarluni ajutoortoqarnera ajoraluartumik takugajupparput.
Sisimiuni meeqqerivimmi sulisup dunkit marluk paarlaattoorlugit erruivimmut qaqorsaat meeqqanut sassaalliutigisimavaa. Meeqqerivimmimi ulloq taanna qerisoorsimaneq pillugu erngup kuuffiianit imeqanngilaq.
Anja Julie Huusomip qaqorsaat meeqqat imertoorsimasaat seernassuseqangaatsiarlunilu neriusinnaasoq nassuiaatigaa. Taamaammat imertoorsimagaanni nakorsiartoqartuaannassaaq.
- Qanermi ajoqusiisinnaavoq, aammali suli itinerusumi ajoqusiisinnaalluni. Tamannalu pillugu napparsimmavimmi misissorneqarlunilu nakkutiginnittoqassaaq, taanna oqarpoq.
Meeqqat pingasut ambulancenik napparsimmaviliaanneqarput kingornalu angerlartinneqarlutik. Meeqqat ajunngitsut nalunaarutigineqarpoq.
Ajutoortoqarnissaa ima pinaveersaartinneqassasoq
Anja Julie Huusomip nassuiaaneratulli Sisimiuni pisutulli meeqqat inersimasulluunniit neriusinnaasumik imigaqartoorsinnaapput.
Taamaammat qanoq pinaveersaartitsinissamut ajutoortoratarpallu qanoq iliortoqarnissaanut iliuuserisassat ilisimanissaat pingaaruteqarpoq.
Anja Julie Huusomip oqarnera naapertorlugu taama ajutoornissaq pinaveersaartinniarlugu eqqiaanermut qaqorsaatit isumannaatsumiitsinnissaat pingaaruteqarnerpaavoq.
- Tamakku immikkoortilluarnissaat pinaveersaartitsinermi pingaarnerpaavoq.
Qaqorsaammik neriusinnaasumik aminnut, isinnut attuuttoortoqassagaluarpat imertuussagaluarukkuluunniit uku tulliuttut malinnissaat pingaaruteqarpoq:
- Qaqorsaammik neriusinnaasumik attuisimagaanni sukkanerpaamik errortorniarneqassaaq, ajoqusertoqarnersorlu nakkutigineqarluni, Anja Julie Huusom oqarpoq, nangillunilu:
- Kingornalu peqqinnissamik suliaqartoqarfiusumukapallattoqassaaq.
Qaqorsaat immaqa taarserneqartariaqartoq
Sisimiuni meeqqerivik erruivimmut qaqorsaammik taama ittumik kisiartaalluni atuisuunngilaq. KNR-ip paasissutissarsiai naapertorlugit nunatsinni kommunini arlalinni taanna atorneqarpoq.
Anja Julie Huusomillu ajutoorneq taama ittoq eqqarsaatigilluartitsilertariaqarsoraa.
- Taama ulorianartigisumik atuinissaq pisariaqarnersoq aamma nalilerneqassaaq, pingaartumik sumiiffinni assigiinngitsorpassuarni atorneqartuuppat, taanna oqarpoq.
Taassuma erruinermut qaqorsaat taama neriuitigineq ajortoq atorneqarsinnaasoq ilaatigut siunnersuutigaa.
Kommunini tamani assingusumik pisoqaratarsinnaaneranut qanoq pinaveersaartitsisoqassanersoq misissorneqartariaqarpoq.
Sisimiuni meeqqerivimmi erngup kuuffia qerisimammat imeqanngilaq. Taamaakkaluartorli imermik dunkimik pajutsinnertik pissutigalugu ammaannarsinnaasimapput.
Qeqqata Kommunianili pisoqarnera iliuuseqarnermik kinguneqarpoq:
- Erngup aqqutaa qerisimatillugu meeqqerivimmi periusissiaq nutarterparput, taamatut kukkuneq peqqinnginniassammat, Qeqqata Kommuniani aningaasaqarnermut ilinniartitaanermullu pisortaq, Malene Broberg KNR-imut sapaatip akunnerani siusinnerusukkut oqarpoq.
