Meeqqat erruissummut qaqorsaammik imertut: Napparsimmavimmit angerlartinneqarput
Meeqqat pingasut erruissutip qaqorsaatissaanik imertinneqarnermi kingunerisaanik Sisimiuni napparsimmavimmut ataasinngormat unitsinneqarput. Qaqorsaat imerpalasoq Sisimiuni ulluunerani paaqqutarinnittarfimmiitsillutik imersimavaat.
- Tupannarpoq, Bettina Frederiksen meeqqat pingasut ilaannut anaanaasoq oqarpoq.
- Tupinnarpoq assorujussuaq taama pisoqarsinnaasoq, kamaammernarpoq. Aamma nipangiutiinnarneqarnavianngilaq, meeqqat pingasut ilaannut anaanaasoq, Larissa Brandt oqarpoq.
Anaanaasut meeqqaminnik ataasinngornermi ullaakkut meeqqerivimmukaassigamik meeqqerivik imeqanngitsoq paasitinneqarput. Imermi qerisimavoq, taamaakkaluartorli meeqqanut dunkimit imigassaqartitsisoqarpoq.
- Oqarfigivaatigut imaassinnaasoq sianerfigitittugut ungasinngitsumi angerlassanersut imaluunniit taakaniiginnassanersut imia qerisimammat, Bettina Frederiksen oqarpoq.
Napparsimmaviliartut
Anaanaasullumi aamma sianerfigineqarput – napparsimmavimmukapallannissaannilli kalerriineruvoq. Qeqqata Kommuniata oqarnera naapertorlugu meeqqerivimmi sulisup dunkit kukkusimavai.
Meeqqerivimmi sulisut ambulancenut sianipallapput. Angajoqqaallu aamma napparsimmaviliaqquneqarlutik attavigineqarlutik.
- Napparsimavimmut ingerlaninni takusinnaallugu ambulancenut ilaallutik tassa taakunnaatsittut. Aqqussua takeq apuunnissamut, Larissa Brandt oqarpoq.
- Apuukkatta aatsaat paasillugu suna imersimaneraat annilaaqqippunga. hajja, ilaa imersimasaat isumaqaraluarama assanut qaqorsaataasimasorluunniit iluamik nassuiaanneqarnikuunata, meeqqat pingajuannut anaanaasoq, Vivi Berthelsen oqarpoq.
Meeqqat pingasut misissorneqareeramik napparsimmavimmut unitsinneqarput.
- Meriaataringaatsiarpoq. Annikiginarpoq aamma, Vivi Berthelsen oqarpoq.
Malittarisassat immaqa allanngortinneqassasut
Meeqqerivik qerruttooqqaneq pissutigalugu imeqannginnerani ammatinneqarsinnaanera angajoqqaat paasisinnaanngilaat.
Qeqqata kommuniatali oqarnera naapertorlugu tamanna ajunngilaq – ulluuneranimi paaqqutarinniffik imermik dunkinik pajunneqarsimavoq. Kommunilli malittarisassat allanngortinneqassanersut maanna misissorniarpaa.
- Qerisimasoqartillugu periuseqarami massakkut aamma arbejdsmiljømi pikkorissaramik oqarfigineqarsimapput, ammasinnaatitaasut imeqaraanni.
- Erngup aqqutaa qerisimatillugu meeqqerivimmi periusissiaq nutarterparput, taamatut kukkuneq peqqinnginniassammat, Qeqqata Kommuniani aningaasaqarnermut ilinniartitaanermullu pisortaq, Malene Broberg oqarpoq.
Maskinamik erruissummut qaqorsaat imigaat imerpalasuuvoq, taanna seernassutsimut uuttuut, tassa PH-p nalinga 13-imiippoq - isumannaallisaanermullu quppersakkami imersimagaanni nakorsamukapallattoqassasoq allassimavoq. Aamma erruissummut qaqorsaat amermut isinullu neriuisinnaasoq allassimavoq.
Meeqqat napparsimmavimmiit ippassaq angerlartinneqarput.
Larissa Brandtili qularisaqarpoq. Taassumami meeqqani misissorluarneqarsimanersoq nalornissutigaa.
- Taama imertoorsimasaat ulorianartigisoq misissorluarneqarnissaat kissaatiginaraluarpoq, taanna oqarpoq.
