Toqqaannartoq: Nunatta qaammataasaa silaannarsuarmut aallartinneqassaaq
Nutarterneqarpoq: Sila pissutigalugu aallartitsisoqarsinnaanngitsoq SpaceX Twitterikkut allapoq. Qaannataasaq aqagu sila ajunnginnerussagunarmat aallartinneqarsinnaassasoq taakku naatsorsuutigaat.
Qaammataasaq Greensat, nunatsinnut atsiunneqarsimasoq suut tamarmik pilersaarutit malillugit ingerlappata unnugu nalunaaqutaq 19.32 silaannarsuarmut aallartinneqassaaq
Tusass tusagassiuutinut nalunaarummi paasissutissiivoq.
Aallartitsineq uani toqqaannartumik malunnaaffigissallugu periarfissaqarputit.
Toqqaannartumik aallakaatitsineq aallartitsinissaq minutsit 15-it sioqqullugit aallartinneqassaaq.
Aallartitsineq silarlunnera pissutigalugu kinguartinneqaratarsinnaasoq Tusassip maluginiaqquaa.
Aallakaatitsinissaq ataasiarluni kinguartinneqareernikuuvoq. Qaammataasammi ippassaq sapaammi aallartinneqarnissaa pilersaarutaagaluarpoq, kinguaattoornerilli pissutigalugu ullumimut kinguartinneqarluni.
Internettimut attaviit aalaakkaannerusut
Qaammataasap nunatta avannaani tunmilu qaammataasatigut attaveqartut aalaakkaannerusumik internetteqarnissaanut kiisalu Qaanaami atuisartut flatratemik attaveqarsinnaalernissaanut qulakkeerutaassaa.
AAMMA ATUARUK Nunatta satellitsitaassaata nunarput internetimut attaviginnerulersissavaa
Illoqarfiit kujataaniittut kitaaniittullu imaatigut attaveqaateqareerput. Nunatta sinneraniittut qaammataasaq aqqutigalugu internetteqarput, taamaammallu internettimut attaviit aalaakkaannginnerullutillu arriinnerupput.
Greensat SpaceX-imit avataarsualiartaammik Falcon 9-mik USA-mi Floridamit aallartinneqassaaq.
Qaannataasaq Floridamit Orlandomit aallartinneqassaaq. Qaammataasap nunatta avannaani tunumilu attaviit aalaakkaannerulersissavai. Assi: Tusass.
