Nunatta satellitsitaassaata nunarput internetimut attaviginnerulersissavaa
Nunatta avannaaniittut tunumiittullu internetterniartillutik attaveqaat kigaattaqisoq ilisarisinnaassajunnarsivaat.
Nunattali kitaani kujataanilu immap naqqatigut kabeli aqqutigalugu attaveqaateqaramik nunatta sinneraniit sukkanerusumik attaveqaateqarput.
Nunarpulli satellitsitaarunik internetimut attaveqaat pitsaanerulissaaq.
Tusass tusagassiuutinut nalunaarummi taama allappoq.
Tusass Qaanaami satellitsimut attaveqaatissaata pitsaanerunissaa anguniarlugu nunamii stationimik ikkussipput. Taanna attaveqaat atorlugu internetimut attaveqaat sukkanerusoq pisisartut atorsinnaalissavaat.
Assi: Tusass
Silaannarsualiartinnera malinnaaffigiuk
Nunatsinni internetimut attaveqaatip pitsaanerulersinneqarnissaata saniatigut aamma nunarsuarmi allanut atuisunut sullississaaq, Tusassilli aningaasaliinera peqqutaalluni satellitsi nunatsinneersutut taaneqarsinnaavoq.
Nunatta satelletsitaassaa “GreenSAT”-imik taaguutilik amerikamiut suliffeqarfiutaat SpaceX suleqatigalugu februaarip tallimaanni sapaammi silaannarsualiartinneqassaaq. Taamaalilluni nunatta sinnerani Qaanaamilu internettimut attaveqaat sukkasooq aamma pigineqalissaaq.
GreenSAT-ip silaannarsualiartinneqarnerani malinnaarusukkuit, Tusassip nittartakkakkut iserfissaq toqqaannartumik malinnaaffigineqarsinnaasoq sapaatinngortinnagu saqqummiukkumaarpaa.
Anoraa silalu qanoq innersoq apeqqutaalluni silaannarsualiartitsinissap nalunaaqutaa allanngorarsinnaasoq, Tusassip ilanngullugu ilisimatitsissutigaa.
