Titartagartat: Qaqqamiit assartuinermut – GM-ip urani aatsitassallu qaqutigoortut Kuannersuarnit ima piiarniarpai
Nunatsinni aatsitassarsiornissamut suliniutit qassiiusut 2021-p naajartornerani piviuusunngortinneqarnissamut qanilliallapput.
Kuannersuarni aatsitassarsiornissamut suliniut, tassa australiamiut aatsitassarsioqatigiiffiata, Greenland Mineralsip aatsitassarsiorfimmik sivikinnerpaamik ukiunik 37-ni ingerlanneqartussamik ammaaniarnera, taakkununnga ilaavoq.
Aatsitassarsiutileqatigiiffik ’aatsitassanik qaqutigoortunik’ tassani piiaarusuppoq. Aatsitassat qaqutigoortut tassaapput pinngoqqaatit assigiinngitsut 17-init amerlanerusut, oqarasuaatinut angallattakkanut, qarasaasianut, seqernup nukinganit nukissiuutinut, biilinut innaallagiatortunut allarpassuarnullu atorneqartartut.
Paasissutissat
- Greenland Mineralsip saffiugassaq 3 millionit tonsiusoq ukiumut qaartittarniarpaa. Taakkunannga 3 millionit tonsinit uku piiarneqarsinnaanissaat naatsorsuutigaa:
- Aatsitassaat qaqutigoortut: ukiut tamaasa 30.000 tonsit.
- Uranitalik: ukiumut 517 tonsit.
- Zink: ukiumut 15.000 tonsit.
- Flourit: ukiumut 8.700 tonsit.
- Saffiugassaq aamma ukuninnga akoqarpoq: thorium, lithium aamma beryllium, taakkuli suliarineqarnissaat akilersinnaanngimmat eqqagassanut toqqorterivinnut toqqorneqartassapput.
Greenland Mineralsip aatsitassanik qaqutigoortunik piiaanermi saniatigut uran, zink aatsitassallu flourit aamma piiarusuppai.
Greenland Minerals Kuannersuarnit piiaanissamut suli akuersissutisinngilaq. Tamanna qaqugu pisinnaassanersoq suli ilisimaneqanngilaq.
Qaarsummiit assartuinermut
Greenland Minerals piiaanisamut akuersissoqalissaguni ammasumik piiaaffiliorniarpoq, tassanngaanniillu, aatsitassat qaqutigoortut tikikkumallugit qaarsuminertarsuit (nalilinnik akoqarpianngitsut) qaartiterlugit piiaarneqassapput.
Saffiugassat aatsitassallu nalituut qaarsumiit Kinamut, tullisssaanik suliarineqarfissaminnut, assartortinnagit sivisuumik suliarineqaqqaassapput.
Qaarsumit aseqqukut nalituunik akullit aatsitassarsiorfimmi ammasumit qaartinneqareerunik suliareqqiisarfinnut marlunnut assartorneqassapput.
Saffiugassaq akuiavittut sequtseriviusumi aseqqorisunngortinneqassaaq, akooruutissamik akuneqarluni pinngoqqaatit assigiinngitsut ujaqqat aseqquinit immikkoortinneqassapput.
Tamatumani zink aatsitassarlu flourit umiarsuarmut assartorneqarnissamut piariissaaq, aatsitassallu qaqutigoortut sinneri uranilu akuiaavimmut qanittumiittumut ingerlateqqinneqassallutik.
Akuiaavimmi taratsut svovlsyrelu atorlugit aatsitassat qaqutigoortut uranilu ujaqqanit immikkoortinneqassapput.
Akuiaavik svovlsyrileriffittaqarlunilu klor-alkalialeriveqassaaq (kaustisk soda saltsyrelu). Akuiaavinni taakkuani Narsami kuussuarmit imeq 1,7 millionit kubikmeteriusoq atorneqassaaq, tamatumalu saniatigut akoorutissat 300.000 tonsit tikillugit atorneqassapput.
Akuiaareernermi aatsitassat qaqutigoortut uranilu nappartaniitsillugit umiarsualivimmi umiarsuarnut assartorneqassapput, nappartallu tassanngaannit Kinamut assartorneqassallutik.
Sinnikut
Aatsitassarsiorfiup ukiuni 37-ni aatsitassarsiorfigineqarnerani sinnikut 111,7 millionit tonsiusapput.
Sinnikut sullulikkut assartorneqarlutik toqqorsivinnut marlunnut inissinneqassapput: Toqqorsiviup aappaa ujaqqanik aserorterinermit sinnikkunut aappaalu akuiaavimmit sinnikunut.
Toqqorsiviit Tasermiissapput.
Uranimit tamarmik 55 procenti thoriumimiillu tamarmit 100 procenti toqqorsivimmiissapput.
Akoorutissat akuiaavimmi atorneqartut sullullit aqqutigalugit aamma toqqorsivinnukartinneqartassapput.
Eqqagassanut toqqorsiviit saniatigut ujaqqat igitassat 111 millionit tonsit aatsitassarsiorfiup qanittuani eqqaavimmut inissinneqassapput.
Suliniut pingasunik ineriartorfeqassaaq:
- Sanaartorneq:
Sanaartornermi aqqusineq, innaallagissioorfik, toqqorsiviit, umiarsualivik aatsitassarsiorfimmilu sulisunut inissiat sanaartorneqassapput.
Greenland Mineralsip kalaallit 200-t nunanilu allamiut 971-it tassani sulisorineqarnissaat naatsorsuutigaa.
Sanaartorneq ukiunik pingasunik sivisussuseqassangatinneqarpoq.
- Ingerlatsineq:
Piffissami tassani aatsitassarsiortoqassaaq. Piffissami tassani kalaallit 328-t nunanilu allamiut 387-it aatsitassarsiornermut atatillugu sulinissaat Greenland Mineralsip naatsorsuutigaa.
Greenland Mineralsip aatsitassarsiorneq ukiuni 37-ni ammatinniarpaa.
- Matusineq:
Aatsitassarsiorunnaarrnermi ineqarfiit akuiaaviit illorsuillu allat ingutserneqassapput, pinngortitarlu iluarsaanneqassalluni. Greenland Mineralsip piffissami tassani kalaallit 41-t nunamilu allamiut arfineq-marluk sulisorissallugit naatsorsuutigaa.
Aatsitassarsiorfimmik matusiniarneq ukiunik arfinilinnik sivisussuseqassangatinneqarpoq.