Namminersorlutik Oqartussat Nunatsinni erfalasulertarnermut malittarisassat oqartussaaffigileraat

Kalaallit Nunaanni Namminersorlutik Oqartussat nunatsinni erfalasoqarnermut malittarisassat akisussaaffigilerpaat. Pissusissamisoortumik ineriartornermik, aalajangiinerullu pingaassusaanik takussutissaasoq, Naalakkersuisut siulittaasuata Jens-Frederik Nielsenip (D) taavaa.

Allattoq Nukaaka Tobiassen

januaarip 18-at 2026 09:59

Nutserisoq Karla Heilmann

Kikkut sumik erfalasulersinnaappat – qaqugulu? Tamanna Kalaallit Nunaanni Namminersorlutik Oqartussat namminneq aalajangersinnaanngorpaat.

Kalaallit Nunaanni erfalasulertarnermut malittarisassat Namminersorlutik Oqartussat akisussaasunngortillugit, danskit Naalakkersuisui nunattalu Naalakkersuisui isumaqatigiissummik marlunngornermi atsioqatigiipput. Tamatumalu nunatsinni Erfalasorput qanoq atorneqarsinnaanissaanik – nunallu allat sorliit erfalasui amuneqarsinnaassanersut aalajangiisinnaasunngortippaat.

Eqqissisimaannaritsili: Dannebrog atorunnaarsinneqalinngilaq. Danskit erfalasulertarnerannut malittarisassaat Inatsiseqarnermut ministereqarfiup suli oqartussaaffigissavai. Savalimmiullu erfalasuat Merkið Nunatsinni – qinnutigineqaqqaarnani allaffissornertaqarnanilu - suli amuneqarsinnaassaaq.

- Amerlaneruleraluttuinnartunik akisussaaffeqalertarnerput pissusissamisoortumik ineriartorneruvoq. Oqartussaaffilli taanna inatsisitigut imaannaanngitsuunngilaq, kisianni pingaassusaanik malunnaatilimmik takussutissaasoq Erfalasorput pineqarmat, Naalakkersuisut siulittaasuat Jens-Frederik Nielsen (D) oqarpoq, akisussaaffinnik siunissami oqartussaaffeqalertarnissatta pilersaarusiukkamik periusissiornissaa pisariaqartoq uparuarpaattaaq.

Inatsiseqarnermut ministeri Peter Hummelgaard (S) erfalasumut tunngasumut suliassaqarfiup Kalaallit Nunaanni Namminersorlutik Oqartussanit oqartussaaffigilerneqarneranut isumaqatigiissut naammagisimaarpaa. Erfalasup Nunatsinnut pingaaruteqassusaa erseqqissaatigaa:

- Kalaallit erfalasuat kinaassutsimut namminersortuunermullu takussutissaangaatsiarpoq, taamaattumillu Namminersorlutik Oqartussaniit malittarisassat oqartussaaffigineqalerneri pissusissamisoorpoq, Peter Hummelgaard oqarpoq.

Isumaqatigiissummi naalagaaffeqatigiinneq suli ataqqineqartoq, aamma Naalakkersuisunik qanimut siunissami suleqateqartuarnissaq, taassuma erseqqissaatigaa.

Akisussaaffimmik tigusinermi Namminersorlutik Oqartussat kalaallit erfalasuannut, Erfalasorput, malittarisassat namminneerlutik aalajangiisinnaanissaminnut, kiisalu Kalaallit Nunaanni nunat allat erfalasuinik atuisinnaanermut piginnaatitaalerput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.