Tipsimit lottomillu sinneqartoorutit

Tipsimit lottomillu sinneqartoruutit pulje b-mik taaneqartartut agguaanneqartarnerat, meeqqat inuusuttullu suliniaqatigiiffiata Sorlaap tamakkiisumik aqulissagai, inatsisartunut siunnersuutigineqarpoq, tamannalu ippassaq siullermeerlugu oqaluuserineqarpoq. Qinnuteqartartunik sullissineq eqaannerulissanerarlugu siunnersuut iluarineqarpoq.

-Aningaasat sukkanerusumik tunniunneqartalissapput.

Suliallu paamaarunneqarpallaaratik ingerlanneqarsinnaalissallutik, taamaalilluni ilaasortaminnik sullissinertik pitsanngorsinnaasoq, Piitannguaq Tittusenip oqaatigaa.

Piitannguaq Tittusenip ilanngullugu oqaatigaa, siorna aningaasat kaaviaartitamik 28 procentii, tassalu aningaasanngorlugit 318.000 koruunit, tipsimit lottomillu aningaasaliissutinit qinnuteqaateqartarnermikkut pissarsiarisimallugit. Aningaasat tammaarsimaartitsinernut, spejderinut  aqutsisussanik pikkorissartitsinernut ingerlatsinermullu atorneqartartut Piitannguaq Tittusenip oqaatigaa.

Sorlaap siulittaasua, Britta Nielsen Johansen siunnersuummut isumaqataavoq. Massakkut allaffissornerup annerpaartaa Sorlaap suliarereeraa oqaatigalugu. Sorlammi tipsimut ataatsimiititaliaq maleruagassat erseqqilluinnartut malillugit, qinnuteqartunik nalilersuereeraangat, K.I.I.I.P-imut ingerlateqqinneqartarput. K.I.I.I.P-imiillu akuersissutit kingulliit tunniunneqareeraangata Sorlammut uterteqqinneqartartut, Britta Nielsen Johansenip oqaluttuaraa.