Portørit peqatigiiffiat nunatsinni ilinniaqqiffiusinnaasumik kissaateqartoq

Ajutoortoqarsimatillugu imaluunniit ikiueqqaarnermik pisariaqartitsisoqartillugu pinngitsoorsinnaanngisatsinnut ilaapput portørit. Nunatsinnili portørit piginnaasatigut ineriartorteqqinneqarnissaminnik pisariaqartitsipput.

Nunatsinni Portørit Peqatigiiffianni siulittaasoq, Ludvig Larsen, taama isumaqarpoq.

- Ullutsinnut tulluarnerusumik ilinniaqqiffiusinnaasumik ujartuivugut. Pitsaanerusumik ikiuigasuarsinnaanitsinnut atortorissaarutinullu atorsinnaasatsinnut ilinniaqqikkusulluta.

Nunatsinni portøritut ilinniarsinnaaneq 2008-mi eqqunneqarpoq. Ludvig Larsenip oqarnera malillugu portørit 150-it ilinniarfiup aallartinneraniit naammassereerput. Nunatsinni portøritut ullumikkut sulisut 70-iullutik. 

Nunanut allanut sanilliullugit nunatsinni portørit ikiuigasuarnermi pisinnaasaat killeqarnerupput. 

- Assersuutigiinnarlugu nipaallisaatinik tunniusseqqusaanngilagut. Morfininik tunniusseqqusaanngilagut. Krampertunut stesolidinik tunniusseqqusaanngilagut. Sukkortunut stesolininik tunniusseqqusaanngilagut.

- Tamakkua annikitsut, ingerlaannaq tunniunneqarsinnaasulluunniit pisinnaatitaaffiginngilagut.

Nunatsinni ilinniaqqiffiusinnaasoq

Portøritut ilinniarneq ukiup affaa ingerlanneqarsinnaavoq, Peqqissaanermik Ilinniarfimmi ingerlanneqartarluni. 

Nunatsinni portørit pisinnaasaat maanna ineriartorteqqinneqartariaqartut, siulittaasoq isumaqarpoq.

- Piffissanngorunarpoq nunatsinni aamma, nunarsuarmi allamisuulli, qaffasinnerusumik ilinniaqqiffiusinnaasumik peqalernissaa. 

Assersuutitut Danmark Savalimmiullu eqqaavai. Taakku portørit ilinniagaat qaffakkiartorsinnaanermik periarfissaqartarput. 

Taamaattorli assigeqqissaanngikkaluarlugit najukkamut tulluarsarneqarsinnaasut, Nunatsinni Portørit Peqatigiiffianni siulittaasup nassuiaatigaa. 

- Nunatsinni aaqqissuunneqarsinnaasunik, tulluarsakkamik peqarsinnaapput. Assersuutigalugu Islandikkunni, Canadakkunni, Norgekkunni issittumi tamakkua ikiuigasuartartut ilinniagarisartagaasa assinganik. 

- Immaqa assigeqqissaartariaqanngilai, kisianni nunatsinnut tulluarsakkamik.

Naalakkersuisoqarfimmut allagaqartut

Nunatsinni Portørit Peqatigiiffianniit Ilinniartitaanermut Naalakkersuisoqarfimmut allagaqarsimallutik, Ludvig Larsen oqarpoq. 

Saaffiginnissutaalli suli akineqanngilaq. 

- Soorunalimi neriuuteqaraluarpunga tusaaneqassalluta. Taavalu aamma arlaatigut aggersarneqassagutta piareersimavugut oqaloqataanissatsinnut. Suut pisariaqartinnerlutigit, suna piumasarinerlutigu. Taanna oqariartuutigerusutarput paasitikkusukkatsigu. 

Nuummi ambulancit agguaqatigiissillugu qaammammut 230-riarlutik ikiuiartorlutik orniguttarput.