Greenland Cruises angallatinik amerlanerusunik pisisoq: Kiffartuussinissamut isumaqatigiissuteqarniartoq

Greenland Cruises angallataatini arfinilinngortillugit aningaasaliissuteqaqqammerpoq.

Suliffeqarfiup pisortaa, Ivik Knudsen-Ostermann oqarpoq. Angallat Targa 44-voq, taannalu suliffeqarfiup Targa 37-utaanut allanut sanilliullugu anginerpaalluni.

- Tamanna pissutigalugu suliassat amerlanerusut suliarisinnaavagut. Angallat kingulleq pisiarisarput angallassissutini anginerpaavoq.

Suliffeqarfik 2022-mi pilersinneqarpoq, ineriartupiloorsimasorlu pisortap oqaatigaa.

- Nuummi angallassisartut amerlaqaat. Takornariartitsinermut angallatiga siulleq 2020-mi pisiaraara, aamma naak angallassisartut allat anginerugaluartut, uagut 100 procentimik kalaallinit pigineqartuni anginersaavugut.

- Nunatsinni inuussutissarsiortut nunatsinneersuunissaat akileraarutillu nunatsinniiginnarnissaat pingaartittuagaraara.

Ivik Knudsen-Ostermann Greenland Cruisesimi pisortaavoq. Taassuma Targa 44-mik nutaamik pisineq Kapisillit Qeqertarsuatsiaallu akornanni sila qanoq ikkaluaraangalluunniit ilaatigut angallassisinnaassasoq oqaatigaa. Assi © : Privat

Nunaqavissut suliassaat

Pisortap suliffeqarfiup aasaanerani takornarianik angallassinernit aamma najukkamiittunut angallassinernit kiisalu angallattoqarnerpaaffiunngitsumi pisortanut angallassinernit ullumikkut isertittagai naligiingajattumik agguataarsimasut oqaatigaa.

- Pisortanut angallassinerpaalooreerput. Nuummi qanittuani nunaqarfinnut angallassisarpugut. Peqqinnissaqarfiup napparsimasunik angallassinissaanut aamma ikiuuttarpugut.

Targa 44 nutaaq suliassat taakku ilaannik suliaqarfiusinnaassaaq.

- Pingaartumik Kapisilinnut Qeqertarsuatsiaanullu angallassinermi sila qanoq ikkaluaraangalluunniit sukkasuumik tikipallassinnaalernissarput.

Targa 44 Greenland Cruisesip angallatigiligaanit, Targa 37-mit 7 fodimik takineruvoq. Assi © : Privat

Siunissamut anguniagaq

Ivik Knudsen-Ostermann aamma Greenland Cruises ullumikkut 12-init 14-inut sulisoqartut, pisortap oqaatigaa.

Suliffeqarfik nammineq angerlarsimaffimmi nalaasaarfimmit qarasaasiakkut suliaqarfiusaraluartoq Nuummi allaffimmik qaammatip ataatsip matuma siorna ammaavoq.

Suliffeqarfik Targa 37-nik allanik marlunnik aningaasaliinissaminik takorluugaqarpoq, taamaalillutillu Sisimiuni, Maniitsumi Nuullu angallassinissanut kiffartuussinermut isumaqatigiissutinik suliarinnittuuniarnissaminnut piareersarsinnaallutik.

- Kiffartuussinissamut isumaqatigiissutinik suliariumannittuuniarnissarput 2030-miillu tigusinissarput anguniagaraarput.

- Nuummi nammineq kiffartuussinnaavarput, kisianni Sisimiuni Maniitsumilu najukkami ingerlatsisunik suleqateqarnissaq pisariaqassaaq.