Timmisartoq ajoquteqarluni Paamiunut miinnartoq

Ikiuiniarneq ataasinngormat nalunaaqutaq 13.04 aallartippoq, Issittumi Sakkutooqarfimmi Joint Rescue Coordination Centremut ajornartoornermik nalunaaruteqartoqarmat.

Taamatut nalunaaruteqarneq timmisartumit Cessnamit sisamanik issimasoqartumit Narsarsuarmit Canadami Goose Bayimut ingerlaartumit pivoq.

Timmisartoq Cessna Narsarsuarmit aallarnermi kingorna minutsini 45-ni ingerlaareersoq motooriata aappaa uuliaarukkiartulersoq timmisartortartup oqaatigaa. Motoori kingunitsianngua unittoorutigineqarpoq motoorilu ataasiinnaq timmisartoq ingerlatigilerpaa.

Ajornartoornermi nalunaartoqarneranit akunnerup affaa qaangiummat timmisartup sumiissusersiornermut atortorissaarutaata ajortissimaneri nalunaarutigineqarpoq. Timmisartortartoq taamaalilluni radiuni atorlugu isigisinnaasanilu naapertorlugit taamaallaat sumiissusersiorsinnaalerpoq.

Paamiunut ingerlaqquneqartoq

Narsarsuarmi upalungaarsimasuutitat timmisartup tikinnissaanut piareeqqullugit Issittumi Sakkutooqarfimmit kalerrinneqarput.

Narsarsuarmili silarlunnera pissutigalugu timmisartoq oqartussaasunit Paamiunut  ingerlaqquneqarpoq.

Timmisartoq Cessna Paamiunut ingerlaarnini tamaat timmisartumit Dash-8-mit Air Greenlandimeersumit ingiallorneqarpoq, taamaaliornikkut isumannaatsumik minnissaa qulakkeerniarneqarluni.

Issittumi Sakkutooqarfik nalunaqutaq 15:00 qaangilaaraa nuannaajallannartumik nalunaarfigineqarpoq, tassalu timmisartoq Cessna isumannaatsumik Paamiunut mittoq.

Taamaammat - taamatut ikiuiniartoqareersoq - Issittumi Sakkutooqarfiup Dash 8-mi Air Greenlandimeersumi inuttat WELL DONE-mik nalunaarfigaat.

Tusagassiorfinnut nalunaarummi aamma upalungaarsimaniarnermi peqataasut allat, Naviair, Joint Rescue Coordination Centre Halifax, Kalaallit Nunaanni Politiit aamma Dronning Ingridiup Napparsimmavissua qutsavigineqarput.