Canada Goose Timmiaq isumassarsiorfigalugu oqortuliarineqarpoq
Timmiaq isumassarsiorfigalugu mersortartut inuit Canadameersut kavaajanik assigiinngitsunik 14-inik ilusilersuipput. Siuliminnit ilisimasatik, ilitsoqqussatik eqqumiitsulioriaasertillu atorlugit Canada Goose suleqatigalugu Projekt Atigi-mik taallugu timmianik immikkuullarissunik ulluni makkunani saqqummersitsipput.
Mersortartullu tamarmik immikkut anguniagaqarlutillu oqariartuuteqarput:
- Uanga niviarsiaqqat mersornermik ilinniartinnissaat anguniarpara, taamaaliornikkut ilaquttatik ukiumi issittumi oqorsaatissaannik pilersorsinnaaniassammatigit, Winifred Nungak, Nunavimmeersoq oqarpoq.
Nunatsinni kalaallisuut atisaliortunit isumassarsiorfigineqaraangata oqallinneqilinngitsoorneq ajorpoq. Project Atigip anguniagaasa ilagaat arnat mersortartut piginnaasaat nunarsuatsinnut nittarsaannissaat.
AAMMA ATUARUK Assuutit kalaallisuut isumassarsiorfigineqarsinnaapput
- Timmiat ukua immikkuullarilluinnartuupput, arnat atisaliornikkut pilersitsisinnaanerannut aqqutissiuussisinnaallutik, nunarsuarlu tamakkerlugu attaveqaqateqarnissamut periarfissillutik, Martin Ratajczak, Canada Goosenik nunatsinnut tuniniaasoq oqarpoq. Taassuma oqaatigaa timmianut iluanaarutit tamarmik kattuffimmut "Inuit Tapiriit Kanatami"-imut nakkartinneqassasut. Kattuffik ilaatigut peqqinnissaq atugarissaarnissarlu pillugit anguniagaqartuuvoq.
