Atisaliortoq: Assuutit kalaallisuut isumassarsiorfigineqarsinnaapput
Atisaliortup Peter Jensenip suliffeqarfissuullu Victoria's Secretip kimmikkaat kalaallisuut kamiinik isumasarsiorfigalugit saqqummiunnikuuaat. Nicoline Nivi Walstedip Miss Danmarkimut 2016-imi peqataanermini takisoqanngitsunik kalaallisooqarniarnikuuvoq.
Tamakkua tamarmik oqallinnerujussuarmik nassataqarnikuupput.
- Soorluuna kalaallisuut oqallisiginaveersaarneqartut, oqallititsisut ilaat Loiuse Lynge Berthelsen kalaallisuut pillugit oqallinneq taama nalilerpaa.
Tassami kalaallisuut eqqartorneqartillugit misigissutsit qaffakaanerpaasartut, atisaliortup oqaatigaa:
- Kalaallisuut kuisittoornerni, atualeqqaarnerni, apersortittoqarnerani, katittoqarnerani ilisisoqarneranilu atorneqartarput. Taamaammat misigissutsit kalaallisuutsinnut atassuteqartorujussuupput.
Taamaakkaluartorli kalaallisuugut isumassarsiorfigineqarsinnaasut oqaatigalugu:
- Tassami isumassarsiorfigineqarsinnaapput, assersuutigalugu nunap oqaluttuarisaanera oqaluttuarineqarsinnaavoq, taamaalilluni aamma nuna, soorlu nunarput, nunarsuarmut nittarsaanneqarsinnaalluni.
Inuit kultuariannit isumassarsiorfiusut
Oqallinneq atisaliortup Jørgen Simonsenip saqqummersitsineranut atassuteqarpoq. Saqqummersitsineq "Iskrystalprinsessen Vol. II - bæredygtig kulturarv"-imik taaguutilik Københavnimiittoq, kulturikkut kingornussat attanneqarsinnaasumik atorneqarsinaanerannut tunngavoq.
Jørgen Simonsenip atisaliaasa ilai inuit kulturiannit isumassarsiorfiupput, soorlu atisaliai amerlasuut Nuummi Kittat-ni Sisimiunilu mersortarfimmi suliarineqarnikuupput.
Saqqummersitsineq "Iskrystalprinsessen" kulturinut isumassarsiornermut assersuunneqarluarsinnaavoq. Ilaarsineq atunngikkaluarlugu.
Saqqummiineq/oqallinneq tusarnaartut pissarsiffigilluaraat, Louise Lynge Berthelsenip oqaatigaa:
- Soorlumi sooq taama kalaallisuutsinnut illersuitiginersugut paasisimaneruleraat, soorlumi uittutullusooq ittut, misigissutitsinnummi attuumassuteqarnera soorlu aatsaat takuleraat.
Oqallinneq Jørgen Simonsenimit, katersugaavilerisumit Peter Andreas Toftimit Louise Lynge Berthelsenimillu ingerlanneqarpoq.
