VIDEO Timersortartut poorskimi unammisaqattaarnerini angusat
![](/sites/default/files/styles/image_934x467/public/oembed_thumbnails/2022-12/iX8jlUqYuNm2MQJfn1BL1AWxhmY829MCJndFYAQHeV8.jpg?itok=uKhoHA0S)
U18-it arnartaanni pissartanngorniutivinnermi SAK Sisimiuneersoq GSS-ilu Nuummeersoq unammipput. Sisimiormiullu aaqqissuissuusut 28-22-mik ajugaapput. Taakku angutitaat aamma pissartanngorniutivinnermi unammipput SAK-p GSS 25-22-mik ajugaaffigalugu. Arnani bronzennattoq tassaavoq Kagssagssuk Maniitsumeersoq angutinilu Nagtoralik Paamiuneersoq.
Poorskimi timersornermit eqikkaaneq sukumiinerusoq uani takusinnaavat.
U16-it niviarsiarartaasa pissartanngorniutivinneranni Nûk-p Nuummeersup Nagdlúnguak Ilulissaneersoq 30-22 ajugaaffigaa, SAK bronzennalluni. U16-it nukappiarartaanni SAK-p GSS målimik ataatsimik ajugaaffigaa, pissartanngorniutivinnerat 25-24-mik inerneqarmat. Nukappissat Nagdlúnguameersut bronzennapput.
U16-it U18-illu Nunatsinni pissartanngorniuunnerat marsip 29-anit apriilip sisamaata tungaanut ingerlanneqarmata holdit 18-it peqataapput, taamaasillutik assammik arsartartut katillugit 160-it poorskimi Sisimiuniipput.
Volleballyimik Nunatsinni pissartanngorniuunnerit Nuummi ingerlanneqarput, Nuummeersorlu GSS aamma PVN pissartanngorniutivinnermi unammipput GSS pissartanngorluni. Holdit taakku marluk angutit pissartanngortivinneranni aamma unammipput GSS aamma pissartanngortuulluni.
Arnat volleballertartut pissartanngorniutivinnerat tamakkerlugu uani isiginnaarsinnaavat
Badmintonimi Anja Skov Kjeldsen Nuummi B-67-imeersoq Hedvig Broberg Qeqertarsuarmi SPG86-imeersoq ajugaaffigalugu pissartanngorpoq, Aviaaja Geisler B-67-imeersoq bronzennalluni. Angutini Nunatsinni pissartanngortoq tassaavoq Iluliarmiu Bror Madsen, taassuma pissartanngorniutivinnermi Nuummiu Jens Frederik Nielsen ajugaaffigaa Nikki E. Nathansen B-67-imeersoq bronzennattuulluni. Badmintonimi pissartanngorniunnerit Aasianni ingerlanneqarput.
Nerrivimmi arsaararluni aamma pissartanngorniuuttoqarpoq, arnanilu Sisimiuni Bat 98-imeersut ujaminnattaassat tamaasa pissarsiaraat: Nukannguaq Søholm kuultinnappoq, Arnannguaq Lyberth sølvinnalluni Arnannguaq N. Larsenilu bronzennalluni. Angutini Ivik Nielsenip Bat 98-ermioqatini Aqqalu Nielsen pissartanngorniutivinnermi ajugaaffigaa. Nuummiu Poul Jørgen Petersen bronzennappoq.