Timersoqatigiit kattuffiata AWG-p kinguartinneqarnera siusigaa
![](/sites/default/files/styles/image_934x467/public/awg_stemningsbilleder2.jpg?itok=Q8QSvjRs)
Siorna ukiup taamaasinerani timersortartut inuusuttuararpassuit Yukonimi Whitehorsemi Arctic Winter Gameseqataanissamut pissangaleruttorput. Ammaanersiornissamulli sapaatip akunnerinnanngortoq aaqqissuussineq taamaatinneqarpoq.
Wood Buffalo Albertamiittoq aappaagumut aaqqissuussisussaagaluarpoq. Nunarpassuilli suli coronamit sakkortuumik eqqugaapput Canadamullu tikinnermi sukangasuunik malittarisassaqarpoq.
AAMMA ATUARUK Arctic Winter Games 2022 kinguartinneqartoq
Aaqqissuisut aamma Arctic Winter Gamesimi nunani tamalaani ataatsimiititaliaq aarlerinartorsiorumanngillat taamaattumik pingasunngornermi nalunaarput Arctic Winter Games 2022 piffissaligaanngitsumut kinguartinneqartoq.
- Kinguartitsineq tupaallannarluni pakatsinarpoq. Nalunngilara inuusuttuaqqat timersortartorpassuit aamma kulturilerisut peqataanissaminnut qilanaaqisut, GIF-mi siulittaasoq Nuka Kleemann KNR-mut oqarpoq.
Aappaagu Arctic Winter Gameseqarnissaanut GIF piareersalereeraluarpoq.
- Tupaallaatigaara kinguartitsineq taama siusitsigisukkut pimmat. Tassami ukioq ataaseq aatsaat qaangiuppat Arctic Winter Gameseqartussaavoq, Nuka Kleemann oqarpoq.
Periarfissat allat
Aasamut Island Games pisussaajunnaarmat aammalu aappaagu Arctic Winter Gameseqartussaajunnaarmat aaqqissuussat allat suut pisinnaanersut GIF-mi suli oqaluuserineqanngilaq.
- Neriuppunga aaqqissuussat taakku kinguartinnerat timersortartut piumassusaannut eqquivallaassanngitsoq, Nuka Kleemann oqarpoq.
- Maanna apeqqutaalerpoq suut aaqqissuussat peqataaffigisinnaassanerivut imaluunniit aaqqissuussinnaassanerivut. Neriuppunga piffissami qanittumi tamanna kattuffiit peqatigalugit eqqartorsinnaassagipput, Nuka Kleemann oqarpoq.
AAMMA ATUARUK Arctic Winter Games aflyst på grund af frygt for corona
Coronap atugaanerani Arctic Winter Gamesimi nunani tamalaani ataatsimiititaliap peqqissutsimut ulorianartut ingalassimaniarpai.
- Assut peqataasut, sungiusaasut namminerlu piumassutsimik ikiuuttut issittumi tamarmeersut peqqissuunissat ernumanartoqartipparput. Kinguartitsineq pakatsinaraluartoq aalajangernerput aalajangiusimavarput, Arctic Winter Gamesimi nunani tamalaani ataatsimiititaliap siulittaasua John Flynn tusagassiutinut nalunaarummi allappoq.