Takornariat amerlanerulersinniaraat
![Aasivissuti - Nipisat](/sites/default/files/styles/image_934x467/public/skrmbillede_20170116_kl_144342.png?itok=Ym0a4LJJ)
Takornariartitsiviup Destination Arctic Cirlep pisortaa Juliane Henningsen Sarfannguini tamanna nalliussillugu sisamanngornermi kaffilertoqarmat peqataavoq:
AAMMA ATUARUK UNESCO-p allattorsimaffianiilerneq pingaaruteqarluinnarpoq
- Nunaqarfittut eriagisassatut allattorsimaffimmi ilannguppoq taamaattumik nalliussineqarpoq nunaqarfimmiunullu periarfissanik imaqarluartussaavoq, Juliane Henningsen oqarpoq.
Misigisassarsiortut amerlanerulissasut
Aasivissuit - Nipisat toqqarneqarmat nunatsinnut takornariarumallutik soqutiginnittut amerlisinnaasut, Destination Arctic Circlemi pisortaq isumaqarpoq.
Tamaanimi misigisassaqaqaaq:
- Aasivissuit - Nipisat nunataa sermersuarminngaanniit Nipisat tungaannut ingerlaarfissuujuaannarnikuuvoq najugaqarfigineqartarnikuullunilu. Tassani piniariarnerit, aalisariarnerit, pisuttuarnerit, qajartornerit assigiinngitsorpassuillu periarfissaapput.
Taava aamma kingornussassanut allattorsimaffimmi nunarsuarmi pingaartinneqaqisumi ilanngunneqartup nunarsuup sinneranut soqutiginarsartuassallugu, Destination Arctic Circlep qulakkiigassaraa.
Nittarsaanneruniaraat
- Misigisassanik ineriartortitsineq peqataaffigisussaavarput. Pikkorissaanerit, workshopertitsinerit sammisaqartitsinerillu assigiinngitsut imatut kinguneqartussaapput; takornariat tikikkunik taava nalussanngilaat oqaluttuarisaaneq nunalu suna tikinnerlugu, periarfissallu nittarsaassinikkut annertusaavigeqataasussaavagut.
AAMMA ATUARUK Aasivissuit-Nipisat UNESCO-p allattorsimaffianiilersoq
Misigisassasiorlutik angalasartorpassuit Aasivissuit - Nipisannut angalasalerpata nunatta aningaasaqarnikkut iluaqutiginngitsoornavianngikkaa, Juliane Henningsenip ilanngullugu oqaatigaa.
- Taamaattumillu periarfissat taakku atorluarneqarpata upperilluinnarpara takornariaqarnikkut, aningaasaqarnikkut innuttaasut Sarfannguaniittut Qeqqatalu Kommunianiittut iluaqutigilluarsinnaagaat. Naggataatigullu soorunalimi nunatsinnut tamarmut iluaqutaasinnaanissaa neriuutigaarput, Destination Arctic Circlep pisortaa Juliane Henningsen oqarpoq.