Malik Berthelsen: UNESCO-p allattorsimaffianiilerneq pingaaruteqarluinnarpoq
![](/sites/default/files/styles/image_934x467/public/malik_erik.png?itok=EjCSo4nC)
Pisortatigoortumik arfininngormat tamanna pivoq. Kalaallit Nunaani sumiiffiit pingasut UNESCO-p nunarsuarmi kingornussassatut allattorsimaffianiititaqalerpoq.
UNESCO-p nunarsuarmi kingornussassatut allattorsimaffiani komiteet ukiormoortumik ataatsimiinneranni
Manamami Bahrainimiittumi Malik Berthelsenip peqataaffigisaani taama aalajangiisoqarpoq.
- Qeqqata Kommunianut, Kalaallit Nunaannut, Issittumullu pingaarutilerujussuuvoq UNESCO-p nunarsuarmi kingornussassatut polarcirkelip avannaatungaa allattorsimaffianiilernera, qanga piniariaatsip ukkatigineqarneranut pingaarutilerujussuuvoq. Kangerlussuup Sisimiullu akornanni ukiuni 4500-ni immakkut nunakkullu nerisaqarnissaq pingaartillugu angalasoqartuartarpoq.
AAMMA ATUARUK Aasivissuit-Nipisat UNESCO-p allattorsimaffianiilersoq
Naalakkersuisut Qeqqata Kommuaniata Danmarkimilu Slots- og Kulturstyrelsenillu suleqatigiinnerannit kingornussassanut allattorsimaffimmi nunarsuarmi pingaartinneqaqisumi Aasivissuit - Nipisat allassimalernissaa iluatsinneqarpoq.
Kalaallit Nunaata saqqummiunneqartarneranut tamanna Aasivissuit – Nipisat taama aalajangiiffigineqarnera pingaaruteqartorujussuusoq Malik Berthelsen oqarpoq.
- Kalaallit Nunaata kangiani Davisstrædip sermersuullu akornanni qaannamik, qimussimik tupernilu issittormiut annakkumallutik inuuniarsimapput. Najugaqarfiusimasut, tuperfiit, ilerrit, inussuit, toqqorsiviit aqqutillu aserutsaalineqarsimanerat piorsarsimassutsikkut ilisarnaatinngorsimapput, taakkulu UNESCO-p kulturikkut eriagisassatut nunarsuarmi kingornussassanut allattorsimaffianiilernera immitsinnut isiginitsinnut avatitsinniittuniillu isigineqarnitsinnut paasineqarnissatsinnullu pingaarutilerujussuuvoq, borgmesteri oqarpoq.