Folketingimut qinersineq 2015 Tigummigallagassat inissiisarfinniisinneqartaleranni aningaasat ilaatinneqanngillat

Politiinit tigummigallagaasut pineqaatissinneqarsimasunut inissiisarfinniisinneqartalerneranni aningaasanik pisariaqartitsisoqartoq, Pinerluttulerinermik Isumaginnittoqarfiup pisortaa oqarpoq. Partii Naleqqap Inuit Ataqatigiillu tamanna isumaqatigiinniarnikkut anguniarlugu neriorsuipput.
juunip 16-at 2015 13:19

Nunatsinni pineqaatissinneqarsimasunut inissiisarfinniisinneqartartut pitsaanerusumik atugassaqartinneqarnissaat ajornartorsiutaavoq, taamaattumik tamassuma pitsanngortinneqarnissaanut aningaasanik pisariaqartitsisoqarpoq.

 

Nunatsinni isertitsiviit pillugit Danmarkimi Inatsisinut atuutsitsinermut ministeriaqarfiup sumiginnaanera, Nunatsinni Pinerluttulerinermik Isumaginnittoqarfimmit isornartorsiorneqarpoq.

 

Politeeqarfinni isertitsivinniisinneqartartut pineqaatissinneqarsimasunut inissiisarfinnit akisussaaffigineqalernerisa ajornartorsiut tamanna pilerpoq

 

Folketingip ombudsmandiata siunnersuutaa Folketingimit atuutsinneqarpoq.

Pinerlunnerup kingorna sivisuumik tigummigallarneqartussat isertitsivinniisinneqartarneri, Folketingip ombudsmandiata isornartorsioreeraalu, isertitsivinniisinneqartartut pineqaatissinneqarsimasunut inissiisarfinnit akisussaaffigineqalerput.

 

Ombudsmandillu taama piumasaqarnera, Danmarkimi Inatsisinut atuutsitsinermik ministeriaqarfiup atuuttussanngortippaa. Taamaalilluni pinerlussimasut eqqartuunneqarnissaminnillu utaqqisut isertitsivinniisinneqartartullu pineqaatissinneqarsimasunut inissiisarfinniisinneqartalerlutik.

 

Taamaaliortalernermili tamassumunnga aningaasartuutissatut atorneqarsinnaasut malinnaatinneqanngillat.

 

Pinerluttulerinermik Isumaginnittoqarfiup kisimi ajornartorsiutiginngilaa aamma politiinit tamanna ajornartorsiutaavoq

Pinerluuteqarsimasut eqqartuunneqarnissaminnillu utaqqisut pineqaatissinneqarsimasunut inissiisarfinni immikkut inissaqartinneqanngillat, taamaattumillu inissiisarfik ulikkaaqqajuartarluni. Tamatuma saniatigut immikkut ilinniarsimasunik paarsisussanik amigaateqarneq ajornartorsiutaasoq, Nunatsinni Pinerluttulerinermik Isumaginnittoqarfimmi pisortaq, Hans Jørgen Engbo oqarpoq.

 

- Tigummigallagassanik paaqqutaqalernermi inissiisarfinni sulisut ilaatigut artukkerneqartarput, taamaattoqaraagallu allatut ajornartumik Danmarkimit ikiortissatsinnik pissarsiortariaqartarpugut. Tamanna ajornartorsiut kisitta ajornartorsiutinnginngilarput, politiinut tamanna aamma ajornartorsiutaavoq.

 

Pinerluttulerinermik Isumaginnittoqarfimmi pisortaq, Hans Jørgen Engbo oqarpoq.

 

Inatsiseqarnermut oqartussaaffik Nunatsinnit suli akisussaaffigineqalinngilaq. Tamassumalu Nunatsinnit akisussaaffigineqalernissaata sulissutigineqarnissaa, Folketingimut qinersinermi Nunatsinnit qiningaasut marluusut maanna tassa sulissutigisassaasa ilaat.

 

Folketingimut qineqqusaartut tamassuma allanngortinneqarnissaa sulissutiginiarpaat

Partii Naleraq sinnerlugu Folketingimut qineqqusaartup, Per Rosing Petersenip piumasaraa, danskit naalagaaffia aningaasanik naammattunik aningaasaliissasoq.

 

- Pissutsit ilugersunarluinnarput. Tamannalu danskit naalagaaffianit ilorraap tungaanut saatinneqassappat taava taakku aningaasaliinerusariaqarput. Tassalu tamanna qularutigineqassanngilaq, Per Rosing Petersen oqarpoq.

 

Pinerluttulerinermik Isumaginnittoqarfik pillugu isumaqatigiissusiorneq iluatsippat, aningaasat tassunga atugassat aamma malinnaatinneqarnissaat, Inuit Ataqatigiinnit anguniarneqarpoq.

 

- Inatsiseqarneq pillugu aningaasaliissutit Danmarkimut Kalaallit Nunaannullu atugassat ullumikkut ataatsimoortinneqarput. Taamaalilluni Kalaallit Nunaata aningaasat atugassaat tamatigut pingaartinneqassanatik, tamassumalu allanngortinneqarnissaa unagut sulissutigissavarput.

 

Inuit Ataqatigiit sinnerlugit Folketingimut qiningassanngortittoq, Aaja Chemnitz Larsen taama oqarpoq.