Tiger Woods biilimik ajutooreerluni napparsimmavimmi uninngasoq

Golfertartoq amerikamiu ilisimaneqarluartoq, Tiger Woods, biilimik ajutoornermini nissumigut assigiinngitsutigut ajoqusersimanini pissutigalugu Californiami napparsimmavimmi maanna uninngavoq.

Biilit Los Angelesip eqqaani assakarsimasut politiit marlunngornermi ullaakkut kalerrinneqarput, ornigukkamillu paasivaat ajutoorsimasoq tassaasoq Tiger Woods.

Golferluni unammiuaarnerni annerni 15-ini pissartaasarsimasup biilinit amuniarneqaqqaariarluni ambulancinik napparsimmaviliaanneqarpoq. Taanna kisimiilluni biilersimavoq.

Biilit assakarsimallutik aseruatitingaatsiarsimasut biilillu saava aseruissimasoq assini takuneqarsinnaavoq.

Tiger Woods Genesis Invitationalimik taallugu Los Angelesip eqqaani Riviera Gold Clubimi golferluni sapaatit-akunnerata siuliani unammiuaartoqarnerani najuuppoq, qitilunninili pissutigalugu peqataasinnaasimanani.

Tiger Woods golfertartut silarsuaanni pikkorinnersaat ilaattut taaneqartarlunilu golfertartut silarsuaanni nuimanerit ilaattut nalilerneqartarpoq.