Camp Century Ministeriusimasup Danmarkip akuersisimanera ilisimasimannginneraraa
![](/sites/default/files/styles/image_934x467/public/article_images/martin_lidegaard_foto_news_oresund_flickr.jpg?itok=8HPaFu1d)
Taannami nunanut allanut ministeriugallarmat Camp Century-mut tunngasut aamma suliaqarsimagaluarpoq.
- Allakkiamik taamaattumik peqartoqarnera tusarakku tupaallaatigaara, ministeriunermami nalaani taamaattoqarnera ilisimannginnakku, Martin Lidegaard KNR-mut taama oqaluttuarpoq.
Nunanut allanut ministeriusimasup maannalu Radikale Venstre sinnerlugu kalaallit nunaat pillugu oqaarseqartartup Martin Lidegaardip USA-p sermersuarmi Camp Centurymi atomimik nukissiuteqarfiliorumallutik qinnuteqaataat danskit nunanut allanut ministereqarfiata 1960-imi akuersaarsimanerannik tusareerlunilu taama oqarpoq.
Asulu nukissiutip ernganik raadiop qinngornerinik mingutsinneqalaarsimasunik sermersuarmut kuutsitsiinnarsinnaasut aamma akuerineqarluni.
2013-imimi Martin Lidegaard nunanut allanut ministeriugallarmat Siumut sinnerlugu folketingimi ilaasortap Doris Jakobsenip Camp Century pillugu arlarleriarluni apeqqutaanut akissuteqartareersoq ilisimaneqarpoq.
AAMMA ATUARUK Atomip eqqagassartaanik sermersuarmut inissiinissaq Danmarkip akuerisimavaa
Tassa ilaatigut atomimik nukissiutip qanoritoorpiarsimanera apeqqutigineqartarluni.
Nunanullu allanut ministereqarfiup Lidegaardillu allakkat toqqortaatit misissorluaqqaarsimasinnaagaluaraat Lidegaardip nassuerutigaa.
1960-imimi nunanut allanut ministereqarfimmi pisortaq, Nils Svenningsen USA-mut akuersissummik tunniussisuuvoq.
- Ilaatigummi assaanerulaaraanni aatsaat nassaartoqarsinnaasarmat qujanartumik nassaartoqarpoq.
1960-imimi pisut ugguarai:
- Taamani Kalaallit landsrådii uani pisumi tusarniaavigineqaratillu suliamu taputartuunneqarsimannginneri immikkut maluginiagassaavoq. Taamaattoqarsimaneralumi assorsuaq ajuusaarnarpoq.
Camp Centurymili erngup mingutsinneqarsimasup eqqagassallu allat uninngatiinnarneqarnissaat salinneqarnissaalluunniit Lidegaardip nammineerluni nalilersuiffigerusunngilaa:
- Camp Centurymi sorpiaat qimaannarneqarsimanersut ilisimaneqarnerulerneri, perlukullu radiop qinngornermik mingutsinneqarsimasut qanoq pitsaanerpaamik iliuuseqarfigineqarsinnaanerinik ilisimasaqarnerulernissaq ajoriffissaqarfinngilara. Taamatullumi ilisimasaqarnerulerneq aatsaat angusinnaagutsigu saliisoqassanersoq imaluunniit allamik iliuuseqartoqassanersoq ilisimalerutsigu aatsaat aaliangiiffisinnaasariaqassavarput.
AAMMA ATUARUK Camp Century skal være et politisk spørgsmål - ikke juridisk
Aamma Danskit akileraartarnermut maanna ministeriat, Kristian Jensen siorna tikillugu nunanut allanut ministeriutilluni Camp Centurymut tunngasunik sammisaqartareerpoq.
Taannali suliaq taanna pillugu KNR-imut oqaaseqarumanngilaq, ullumikkullu nunanut allanut ministeriusumut Anders Samuelsenimut innersuuteqikkaluarpaatigut, taannali aamma oqaaseqartinniaraluaratsigu iluatsinnatigu.
AAMMA ATUARUK Camp Century Naalagaaffiit Peqatigiinnut suliassanngortinniarlugu nunatta sioorasaarutigigaa