Tele-Postip nunarput tamakkerlugu sullippaa - Nuuinnaanngitsoq
- Siunissamut iliuusissatut pilersaarutitsinnut ilaasutut immap naqqatigut kabelip 2015-16-imi uiguneqarnissaa pilersaarutaavoq, tamannalu suli attapparput.
- Misissorsimavarput tamanna 2015-imi ingerlassinnaanerlutigu kisianni tamanna ajornarsimavoq, Tele-Postip siulersuisuini siulittaasoq Agner N. Mark taama oqarpoq.
Aamma atuaruk Qasigiannguanut immap naqqatigut kabeliliisoqarsinnaanersoq Tele-Postip misissorniarpaa
Immap naqqatigut kabeli ilinniartitaanermut pingaaruteqarpoq
Qeqqata Kommuniata, Kommune Kujalliup Qaasuitsup Kommuniatalu borgmesteriisa oqaatigaat nunatsinni annertuumik naligiinngittoqartoq, tamannalu ilaatigut ingerlatseqatigiiffiit taarsigassarsisinissamut periarfissaasigut takuneqarsinnaasoq.
- Qeqqata Kommunianut aamma Qaasuitsup Kommunianut immap naqqatigut kabelissaq pingaaruteqarluinnarpoq. Immap naqqatigut kabelissaq 2015-imit ajoraluartumik kingusinnerusukkut pilersinneqartussatut kinguartinneqarpoq, Dorph, Berthelsen aamma Wæver Johansen tusagassiorfinnut nalunaaruteqarlutik taama allapput.
Annertuumik aningaasaliiniarnermi taarsigassarsinissamik pisariaqartitsisoq
Telep nammineq kisitsisaatai naapertorlugit 2014-imilu 15 mio. koruunit missaanniittut aningaasaliissutigineqarput immap naqqatigut kabelip avannamut ingerlateqqinneqarnissaanut misissueqqaarnerinnarmut. Ukioq 2015-imi naatsorsuutigineqarpoq suli 20 mio. koruunit missaaniittut immap naqqatigut kabelip ingerlateqqinneqarnissaanut piareersaateqarnermut.
Aamma atuaruk TELE: Attaveeruttoortarneq immap naqqatigut kabelip takinerusup aqqiivigissavaa
Tele aamma radioqarfikkut sakkortusaavinnut tunngatillugu pilersaaruteqarpoq aammalu oqarasuaatit angallattakkat atorlugit internettersinnaaneq annertusarniarneqarluni. Tamannalu pissutigalugu ingerlatseqatigiiffik aningaasanik taarsigassarsiniarpoq.
- Naalakkersuisut maannakkut taarsigassarsiarisimasatsinnut qularnaveeqqusiisimanngillat aamma uagut naatsorsuutiginngilarput taarsigassarsiarisassatsinnut taamatut iliortoqarnissaa. Taarsigassarsiniarnermut atugassarititaasut isumaqatigiinniutigereerutsigit taava taarsigassarsiaqarnissaq, sullissinissamut isumaqatigiissuterput tunngavigalugu Naalakkersuisunut akuersissutigisassanngorlugu saqqummiunneqassaaq. Neriutigaarpullu ukiup matuma ingerlanerani kingusinnerusukkut piareersimassalluta, Agner N. Mark taama oqarpoq.