TELE: Attaveeruttoortarneq immap naqqatigut kabelip takinerusup aqqiivigissavaa

Sakkortusaavik DYE ONE Qaqqatoqqamiittoq kiisami iluarsineqartoq, TELEp ippassaq ualikkut nalunaarutigaa. Taamaalilluni radiukkut nalunaarasuarnikkullu attaveqaatit atorneqaqqissinnaalerput.
juunip 08-at 2014 15:23

Sisimiuni Kangerlussuarmilu oqarasuaatitigut ajutoornerup saniatigut nunaqarfinni Pilersuisup pisiniarfii aamma mittarfeqarfiit pisiniarfii ullorpaalunni aningaasat taamaallaat atorlugit pisiniartitsisarput imaluunniit pisiniat akiligassarsisariaqartarlutik.

TELE-mi annertuumik sivisuumillu teknikkikkut attaveeruttoorneq KNI-p qarasaasialerinermut pisortaata Anders Gregers Ratzow-ip uumigeqaa. Taannalu Radioaviisimut ippassaq ima oqarpoq:

- Pisumut matumunnga assingusumik pisoqartillugu malitassamik pilersarummik data-nillu ingerlatitsinerup innarlerneqannginneranik qulakkeerinnittussamik Tele peqarsimasuuppat, tamanna pinngitsoorneqarsimasinnaagaluarpoq.

Siunnersuusiortoqalersorli TELE-mi paasissutissiinermi pisortap Ivalo Egedep ullumi akissuteqarluni oqaatigaa.

Taassuma oqaatigaa, Telemit KNI-p attavigineqarnissaa pilersaarutaasoq, taamaalilluni qarasaasiakkut ajutoortoqartillugu akiliisitsisarnermut tunngasut iliuuseqarfigineqarniassammata.

Aamma kabelip immap naqqatigoortup takinerulersinneqarsinnaanera sivisuumik pilersaarusiorneqartoq iluaqutigalugu radiukkut attaveqaatip Kitaata annersaani kisimi isumalluutaanera iliuuseqarfiginiarneqarpoq.

- Ulluni makkunani Kitaani sineriammi misissuivugut immap naqqatigut attaveqaatilersuisinnaanerput misissorlugu. Soorlu Nuumminngaanniit Maniitsup tungaanut, Maniitsumit Sisimiut tungaanut taava aamma Qeqertarsuup Tunuanut ingerlaqqittussamik misissuilluta. Misissuineq naammassippat paasissavarput aappaagu aappaaguaguluunniit immap naqqatigut sinerissap avataatigut kabelilersuisinnaanerluta.

TELE-mi attaveqatigiinnermut pisortaq Ivalo Egede taama oqarpoq.

Kabelip immap naqqatigoortup suatigoortinneqarsinnaanera pillugu siorna aamma misissueqqaartoqarpoq.