NALILIINEQ TELE-POST-imi aqutsisut siulersuisullu suleqatigiinniarnikkut uteqqiattumik ajornartorsiortarsimasut
Tele-Postimi qullersaasut, pisortaanerugallartup Steen Montgomery-Andersenip pisortaanermullu tullersortaagallartup Per Svendsenip siulersuisunik suleqateqarniarnikkut ajornartorsiuteqarneq innersuussutigalugu sapaatit-akunnerata siuliani atorfimminnit tunuarniuteqarput.
Qullersallu siulersuisullu akornanni annertuumik isumaqatigiinngissuteqartoqarnera aatsaat pinngilaq.
2014-imi ukiakkut, taamani pisortaanerusoq Michael Binzer, TELE-POST-imi siulersuisut siulittaasuannik Agner Markimik suleqateqarniarnikkut ajornartorsiuteqarneq tunngavilersuutigalugu atorfimminit tunuarpoq.
Michael Binzer pisoq nittartakkamini marsip 30-ani ima allaaseraa:
- TELE-POST-imi atorfinnit nuannareqisannit ukiup appaa avillugu qaangiutiinnartoq tunuarnera uanga aamma akisussaaffigaara. Imaanngitsoq suliffiga suleqatikkalu nuannarinnginnakkit, siulersuisunulli siulittaasup uangalu suleqatigiinniarnerput ajorpallaaqimmat, ilami allaat ingasapallaalermat. Akisussaaffik tiguara tunuarniuteqarlungalu, taamaaliunngikkumami napparsimalissagama.
Aamma atuaruk Michael Binzer TELE-POST-imi atorfimminit tunuarpoq
Michael Binzerip siorna ukiakkut atorfimminit tunuarnerata kingorna, TELE-POST-imi aqutsisut tamarmiusut, Steen Montgomery-Andersen Per Svendsenilu ilanngullugit, TELE-POST-ip siulersuisuinut siulittaasup tullianut Paneeraq Olsenimut allagaqaateqarput septembarip tallimaani 2014-imi ullulerneqartumik.
Sulisut qulliunerusut allakkiaminni siulersuisut siulittaasuata pisortaanertullu atorfinitsinneqartussap akornanni suleqatigiinnermik pitsaasumik sivisuumillu atasinnaasumik pilersitsisoqarsinnaassanersoq toqqissisimanartinnagu ilaatigut allaaseraat.
Paneeraq Olsenilu kaammattorpaat piginnittumut, Namminersorlutik Oqartussanut, piaartumik attaveqaqqullugu, piginnittup siulersuisut siulittaasussaannik nutaamik kaammattuuteqarnissaat siunertaralugu.
Aamma atuaruk Tele-Postimit tunuarniartut pillugit oqaaseqarusuttoqanngilaq
TELE-POST-imi siulersuisut aqutsisullu maanna siornatigullu suleqatigiinniarnikkut ajornartorsiutaasut pillugit Agner Mark KNR-imit sapaatit-akunnerat kingulleq tamaat oqaaseqartinniartaraluarparput.
Taannali oqaaseqarusunngikkallarpoq, pisortaanerugallartup Steen Montgomery-Andersenip paatsuunganartunik, Agner Mark naapertorlugu, suliap ingerlanera pillugu tusagassiutitigut saqqummiunneqartunik, aaqqiissuteqarnissaminut periarfissinneqartinnagu.
Steen Montgomery-Andersen, KNR-imit aamma oqaaseqartinniaraluarparput, taannali 'maannakkorpiaq oqaaseqaateqarnissaminut periarfissaqanngikkallarluni' oqarpoq, taamaattumillu aaqqiissutissamik takkuttoqassanersoq takkuttoqassannginnersorluunniit aamma oqaatigisinnaannginnerarpaa.
