Tassaarsuaqarsinnaammat qaqqamut majuartarfiliortut
- Sanasut qummut massakkut apissippat. Taamaallaat tigummivilersunngilaarpaat, Pavia Møller oqarpoq.
Karrat kangerluanni tassaarsuaqalissagaluarpat, Niaqornat eqqugaanerpaasussanut ilaassangatinneqarpoq.
Sumiiffimmi qaqqaq sisuussappat, Niaqornat mallinit 9 meterinit 17 meterinut portutigisunit minutsit 23-t ingerlanerini eqqorneqarsinnaavoq.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Tassalu nunaqarfimmi 35-nik innuttaqartumi majuartarfinnik qimaaffissanik maanna sanasoqarpoq.
- Uani Niaqornat nunaqarfiup qeqqapajuani qaqqajunnannguaq uiumik taasagaat qimaaffissiatut ilanngullugu tummeqqanik pilersitsivigaarput. Taanna tassaarnerata angusassarinngimmagu,Avannaata Kommuniani upalungaarsimaniarnermut pisortaq, Isak Pjettursson oqarpoq.
Aammali majuartarfiit allat atorneqarsinnaasussaapput.
- Taavalu illuatungaaniittut kangermut qimaaffissaat aamma tummeqqat pioreersut, kisianni aserfallassimasut aaqqissorlugit suliarineqarput.
AAMMA ATUARUK Katrine Kruse Hansen Niaqornaneersoq: Maani najugaqaannassaanga
Niaqornanilu innuttaasup qimaaffissat sumiittut nalunagit toqqissisimanaraa.
- Aggululluta qimaasoqassasoq naatsorsuutigaara. Uanga illoqarfiup kujataatungaani qummut, taakkualu qeqqaniittunut majuartarfiit sananeqartut, Pavia Møller oqarpoq.
Nunaqarfimmilu tassaarsuassaqassagaluarpat aseruatiterinerit minnerpaaffimmiitinnissaannut allanik iliuuseqartoqarpoq.
- Ilaatigut nunaqarfimmi qimaaffissat pilersinniarsaralugit, taavalu tassaarsuaqassagaluarpat peqqumaatissat tassaarsuup angusassarinngisaanut iliorarlugit aallartinnikuuvugut, Isak Pjettursson oqarpoq.
AAMMA ATUARUK Tassaarsuaqarsinnaaneranik naliliineq nutaaq: Illut, nukissiorfiit peqqissaavik eqqugaaratarsinnaasut
Tassaarsuaqassagaluarpalli Niaqornat nunaqarfinni eqqugaasorujussuusinnaasuni kisimiinngilaq.
Qaarsut 113-inik innuttaasoqartoq malissuarnit 9 meterininit 23 meterinut portussusilinnit minutsit 26-t ingerlaneranni eqqorneqarsinnaavoq.
Aamma tassani innuttaasut sukkasuumik qaqqamukarsinnaasariaqarput.
- Qaarsuni aamma Qaarsut kitaatungaaniittut illut imaalitsiaannaq qimaaffissaqanngitsut qaqqajunnannguup qaani aamma tummeqqanik pilersitsiniarfigaagut, Isak Pjettursson oqarpoq.
AAMMA ATUARUK Niaqornanit Qaarsuniillu qulit nuukkusuttut
Karrat Kangerluani qaqqap misissuiffigineqarnerani sumiiffiit nakkaasinnaasut pingasut aarlerinaateqartutut nalilerneqarput.
Sumiiffiit illullu annertuumik taassaarsuaqarnerani anguneqarnissamut ulorianartorsiorfiusumiittuni najugallit nuukkusukkunik ikiorneqarsinnaasut naalakkersuisut aalajangerpaat.
Innuttaasut katillugit 176-it nuunnissaminnut periarfissinneqassallutik.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.
