Niaqornanit Qaarsuniillu qulit nuukkusuttut
Karrat Kangerluanni qaqqap nakkaasinnaanera aarlerisaarutigineqarmat, ajornerpaamik pisoqarpat inuit 176-it angerlarsimaffiisa eqqugaanissaat ilimasaarutaavoq.
Inuillu qulit, amerlanerit Niaqornaninngaanneerlutillu Qaarsuninngaanneertut maannamut nuukkusuttut Avannaata Kommuniani pisortaaneq oqarpoq.
AAMMA ATUARUK Karrat Kangerluat pillugu naliliineq nutaaq: Innuttaasut 176-it piumagunik nuunnissamut neqeroorfigineqartut
Innuttaasut ima amerlatigisut nuunnissaminnut periarfissinneqassapput:
- Niaqornat: 35
- Qaarsut: 113
- Uummannaq: 10
- Saattut: 8
- Ukkusissat: 3
- Ikerasak: 7
- Nuugaatsiaq: Najugaqartoqanngilaq
- Illorsuit: Najugaqartoqanngilaq
Katillugit: 176
Paasissutissarsiffik: Naalakkersuisut
Nuunnissamik kissaateqartut tamarmik Uummannami inissikkallarneqartarnissaat pilersaarutaavoq. Kommunip inissiaataani Uummannami inissarsiortut 50-it missaanniipput, inissiigallarnermili namminersortut inaataat aamma periarfissaapput.
- Apeqqutaavallaartorsuussanngilaq uani kommunip inissiaatiginerai imaluunniit namminersortut inissiaatiginerai. Annilaagasoqartillugu inissiigallarnerit periarfissatut taaneqarput, taannalu uagut kommunimit naammassiniarsarissuarput, Nick Nielsen KNR-imut oqarpoq.
Nuukkusuttut sumut nuukkusullutik kissaataat kommunip ilisimavai oqaatigerusunnagilli. Nuuffissatummi kissaatigineqartut inissaqarnersut suli ilisimaneqanngimmat. Qanorlu sivisutigisumik Uummannami inissikkallaqqassanersut aamma kommunip naluaa.
- Apeqqutaalluinnarpoq init attartortakkat neqeroorutigineqartut qaqugu naammassisinnaaneri. Taavalu ininut attartortakkanut nuuffigerusutaminnut akuersaarnersut, taakkualu massakkut nalunaarsorneqarlutik ingerlanneqarput.
Karrat Kangerluanni piffiit pingasut aarlerinaateqartut
Nunatsinnit, Danmarkimit Norgemiillu ujarassiuut Karrat Kangerluani piffiit pingasut aarlerinaateqartutut oqaatigaat. Taakku qaqqami 2017-imi nakkaasoqarneranit tassaarsuaqartitsisumut qanittumiipput. Piffiit assimi normu 1, 2, 3-millu nalunaarsorsimapput. Piffik 3-mik nalunaaqutsersimasoq ataatsikkut nakkaassagaluaruni ajornerpaamik pisoqarsinnaavoq.
Nuukkusuttut nuunnerminnut aningaasartuuteqassanngillat. Inissikkallareerlutilli inissavimminnut nuunnerminni inimut attartortutut akiliisassallutik. Inissiigallarnermi aningaasartuutit kimit akilerneqarnissaat suli inissinneqanngilaq.
- Uagut aningaasartuutit taakku ingerlattussaavagut innuttaasunik sullissineq kommunimiimmat. Taava kingusinnerusukkut Namminersorlutik Oqartussat paaseqatigalugit taakkua aningaasartuutit qanoq aaqqinneqassasut kommunit Naalakkersuisullu akornanni oqaloqatigiissutigineqassooq.
Nuukkusuttut utaqqisuni allatsissimasut allat qaangerlugit siullinngortinneqassanersut taassuma akisinnaanngilaa.
- Misissuinerup nutaap takutippaa, Karrat kangerluani qaqqap sisoratarsinnaaneranut tunngasoq siullermik ilimagineqartumiit suli ajornerujussuarmik kinguneqaratarsinnaasoq.
- 2017-mi pisoqarfiusup nalaani tassaarsuaq tallimariaammik arfineq-marloriaammilluunniit sakkortunerulluni takkussinnaavoq.
- Taamanikkut nunaqarfiit Illorsuit Nuugaatsiarlu tassaarsuarmit eqqugaapput.
- Qaqqaq sisoratarsinnaasoq imaanut ataasiarluni tassaarsuartut nakkaariataaraluarpat eqqussavai tassaapput; Qaarsut, Niaqornat, Saattut, Ukkusissat, Ikerasak Uummannarlu.
- Taakkunanilu inuit 176-t illui sissamut qanittumiipput, illullu taakku amuneqarsinnaapput.
- Nussortoqarsinnaaneranik neqeroortoqarpoq – kisianni neqeroorut nammineq piumassutsimik aallaaveqartussaalluni.