Tasiilaq pingasunngormalli internetteqanngilaq
Netflix, nutaarsiassat aamma nem-id.
Internetteqanngitsumi inuuneq inunnut sanngitsunoortuunngilaq, inuit ilanngui oqarsinnaasarput.
Kisianni inuuneq taanna Tasiilami innuttaasunut atuuppoq. Pingasunngormalli telefonit internetillu atorsinnaasimanngillat.
Attaveqaatinik sakkortusaaviit marluk nutarterneqarnerat pissutaalluni satellittikkut attaveqaatit kipineqarput.
Tusass’imi Transmissions’ilerisut (nassitsissutilerisut (aaqq.) immikkoortortaanni pisortaq Kim Zinck oqarpoq:
- Internettikkut attaveqarniarneq, satellittitoqqat nutaanik taarsersorneqarneranni killeqalertarpoq. Attaveqaatit artorsalertaramik. Attaveqartoqarsinnaavoq, kisianni internettikkut attaveqaatinik atuiniartut amerlangaammata attavilunneq kingunerisarpaa.
Attaveqaatit ilimagisamit ajornerusut
Tasiilami innuttaasorpassuit, attaveqarsinnaanngivissimasutut misigisimapput. Aammami piffissap ilaani sms-imik nassiussineq nassiussivigitinnerlu, sianersinnaaneq aamma dankorti atorlugu akiliisinnaaneq atorsinnaajunnaarallarsimapput.
Taama pisoqarnera Tusass’imut uissuumissutaavoq, Kim Zinck oqarpoq:
- Attaveqaatit ajornerat kiffartuussatta misigisareerpaat. Ilisimagisatsinnillu maanna ajornerupput. Ilimagigaluarparpummi, internetikkut attaviit sakkukinnerpaamut inissikkutsigit attaveqaateqaannartoqarsinnaassasoq, oqarpoq nangillunilu:
- Taamaariarmat suliassatsinnut ilanngupparput, inuiaqatigiinni iluarsisariallit suliarineqartuarsinnaaniassammata, attaveqaatini sukkassutsit aamma pitsanngorsarnissaat, oqarpoq.
Pisut ilaatigut Kalaallit Nunaata Politiivisa Facebookikkut ima nalunaaruteqarnerannik – immaqa imminut assortortutut isigineqarsinnaapajaartumik - kinguneqarpoq:
”Tasiilami telefonikkut attaveqarsinnaaneq allanngorarmat, Tasiilami Politeeqarfik ulloq unnuarlu sulisoqartilerparput. Innuttaasut pinartoqarnerani namminneq aggerlutik taamaalillutik nalunaariartorsinnaapput. Nammineq saaffiginninneq pisassaaq telefon normu 70 14 48 akisinnaanngikkaangat.”
Naalli attaviit ilimagisamit ajornerunerat Tusass’imut uissuummissutaagaluartoq, innuttaasut piareersimanerusimasinnaagaluartut, Kim Zinck isumaqarpoq:
- Piffissaagallartillugu sullitatsinnut ilsimatitsissutigaarput, atortunik nutarterisoqalersoq. Attaviit arriillisinnaanerat qaammat sioqqullugu tusagassiorfinnut nalunaarutigaarput. Nutarterinerillu aqagumut aallartittussanngormata sullitatsinnut sms’ikkut ilisimatitsivugut.
Tui allakkisartoq sukkaneruvorluunniit
Taamaakkaluartoq pisut Tasiilami innuttaasunut tupaallaataapput. Ilimagisimanngilaammi, attaveqaatit taama ajortiginissaat.
KNR’imiit innuttaasunik apersugaqarusussimagaluarpugut, kisianni – tupinnanngitsumik – sianernerit iluatsissinnaanngillat.
Internettikkut attaveqarnerit killeqaqisut aqqutigalugit innuttaasut arlallit Facebook aqqutigalugu kamaammeqqanertik ersersippaat, ilaatigut allallutik:
”Ilungersornerput tusaalaarsiuk nassuiaallutalu qanoq iliortoqarnersoq sunalu suliarissanerissi, qaa? Aamma nassuiaatigilaarsiuk, sooq attaveqaatit kipivinnersut, sioqqutsillusimi taanna ilimasaarutiginngilarsi? Tusass, uuminapalaarsuaq, illoqarfipput takornarissanik ulikkaarpoq, akiligassaminnik akiliinatik pisiaqarnatillu aallaqqittussanik.”
”Ilumut ullutsinni niuertutut inuussutissarsiorniarneq ajornavippoq, ilissi internettimik pilersuisuutillusi…. Inuit akiligassaminnik akiliisinnaanngillat aamma ullutsinni aningaasanik pappiaranik kaasarfimmiortoqassaarpoq, plastikkinnguaq akiliutitut atortaratsigu…. Maskina, ilissi attaveqaateqartitassarsi atorlugu… kisianni isumagisinnaavisiuk? Tui allakkisartartoq ilisiinnilluunniit sukkaneruvoq… Pilersaarusiorluarsimannginneq… Piareersarluarsimannginneq…”
Tusass tallimanngorneq ualisoq nalunaarpoq, attaveqaatit nalinginnaasunngulersut, kisiannili pitsaassuseq kingusinnerusukkut aatsaat tamakkiisuuleqqissasoq.
