Tunumi internetip sukkassusaa piffissami qanittumi arriillingaatsialersoq

Qaammataasaq nutaaq, GreenSAT, nuna tamakkerlugu internetimik pitsaanerulersitsisussaq piareerpoq.

Tusass taama tusagassiorfinnut nalunaarummini ilisimatitsivoq.

Tassani atuarneqarsinnaavoq Ittoqqortoormiini Tasiilamilu tigooraaviit, qaammataasamut attavillit, taarsersorneqassasut.

Aggustip aallartinnerani nutarterinerit aallartinneqassapput. Iluarsartuussineq Tunumi ullunik 8-10-nik sivisussusilimmik attavinnut tamanut sunniuteqassaaq - radio tv-lu minillugit.

- Nutarterineq atuisunut malunnaateqassaaq, attaviimmi tamarmik annertuumik arriillineqarallassapput, Tusass taama allappoq.

Filminik aalliaarit

Tusass aammattaaq allappoq attaviit arriissusaat streamerutini, nittartakkanut isernermi inunnullu attaveqaatinik atuinermi malunnaateqassasoq.

Tusassip taamaammat innersuutigaa Tunumi atuisut maannakkut filminik nangeqattaartulianillu streamerutiminniit (Netflix, Viaplay, HBO il.il.) atortorissaarutiminnut aallereeqqullugit.

Nutarterinerup nalaani streamerutit atorneqarsinnaajunnaarallarnissaat ilimanartoq Tusass naliliivoq.

Nutarterinerup aallartinnginnerani ulloq ataaseq sioqqullugu atuisut Tusassimiit SMS-ikkut nalunaarfigineqarumaarput.