ATV-nut Kangerlussuup Sisimiullu akornanni aqqutitaassap ilaa ammartoq
ATV-nut Qeqqqata Kommuniani Kangerlussuup Sisimiullu akornanni aqqutitaassap ilaa sapaatit akunnerata naanerani kiisami ammarpoq.
ATV-nut aqqutitaassap taassuma ilaa ammartoq 84 kilomteritut isorartutigaaq.
Sinnerata ammarnissaa kinguartittoq
ATV-nut Sisimiut Kangerlussuullu akornanni aqqutitaassap sinnerata ammarnissaa aasamut kinguartittoq, Qeqqata Kommunia tusagassiorfinnut nalunaarummini allappoq.
Tamanna Sisimiuni imeqarfiup qanittuani aqquserngup ilamerngata suli qulakkeerneqarsimannginneranik pissuteqarpoq.
Sisimiuni erngup pitsaassuusaa qaffasissuujuaannaqqullugu, aqquserngup ilamernani tassani imeqarfik sinerlugu sinaakkusersukkamik pakkersimaartitsisumillu kussinilimmik aqqusiniortoqassaaq.
Pinngortitamut appakaaffissaqarnerulissasoq
Naalakkersuisumik Kalistat Lundimik ATV-nut aqqutitaassap ammarnissaannut suleqateqarnertik nuannaarutigigini inuillu Kangerlussuup eqqaani pinngortitamut appakaaffissaqarnerulernerannik kinguneqartussamik aqqutitaassap sinnerata aasaru ammarnisssaa qilanaarigini, Qeqqata Kommuniata borgmesteria Malik Berthelsenip oqaatigaa.
Kunngikkormiut nunatsinnut aasaq juunimi tikeraarnerminni Sisimiuniimmata, kunngi Frederik erninilu pring Vincent ATV-nut Sisimiut Kangerlussuullu akornanni aqqutitaassaq ATV-eerlutik sukkalisaarfigillatsiarpaat.
ATV-nut aaqqutitaassap taassuma inaarnissaa akikinnerpaaguni 20,7 millionit koruuneqassasoq, siorna maajimi paasinarsivoq. Qanorpiarli akeqassanersoq, Qeqqata Kommuiata tusagassiorfinnut nalunaarutigeqqamisamini ilisimatitsissutiginngilaa.
Aqqutitaassalli sinnera 2025-mi juulip aallaqqaataata missaani ammassangatikkitsik, kommuni allappoq.