Franskit nutaarsiassaqartitsiviat: Tasiilami inuusuttut imminut toquttarneq pillugu isiginnaartitsissusiortut

Inuusuttut Tasiilameersut illoqarfigisaminni imigassap, kinguaassiutitigut kannguttaatsuliornerit imminullu toqunnerit nipanngersimassutaasarnerat maajip qaammataani unitsinniarsaraat.

Franskit nutaarsiassaqartitsiviata, France 24-p Tasiilaq maajimi tikeraarpaa inuusuttullu suliaat malinnaaffigalugu.

AAMMA ATUARUK Tasiilami inuusuttut nipangersimaneq isiginnaartitsinikkut unitsinniaraat

Inuusuttup Eino Taunajip aallarneeqataaffiani inuusuttut namminneq oqaluttuassaminnik oqaluttuartinneqarnissaannik siunertaqartumi isiginnaartitsissusiornermi katersuupput.

- Inuusuttuusugut inuunitsinni ajornartorsiuterpassuaqarpugut oqaatigineqarsinnaanngillallu. Taamaammat inuusuttut allat ikiorniarlugit aalajangerpunga. Taammammat una aallartippara. Taakku inuunerminni oqaluttuassatik oqaluttuaraat qiasullu takuneqarsinnaapput ajornartorsiutitillu oqaluttuaralugit, Eino Taunajik France 24-mut oqarpoq.

AAMMA ATUARUK Tasiilami meeqqat inuusuttuaqqallu sumiginnagaanerat ajorluinnarpoq

- Qatanngutiga taamaaliorsimasoq (imminut toqussimasoq aaqq.) tusarakku eqqarsaraluarpunga suujunnaassallunga kisimiittorujussuanngortippaangami. Tataannaqaaq. Tuppallersagassaajunnaarpunga. Uani (isiginnaartitsissummi aaqq.) taperserneqarneq nassaarigakku qujanaaq, Joelsine Imaka oqarpoq.

Franskit nutaarsiassaqartitsiviata ilanngutassiaani aallartitseqataasut ilaat, ilaatigut Eino Taunajik inuusuttullu arlallit isiginnaartitsissutiminngaanneersut naapinneqarpoq inuusuttullu isiginnaartitsinerannit qisuariaatit ilaat aamma takutinneqarlutik.

France 24-p ilanngutassiaa uani takusinnaavat (Tuluttoorpoq)