Ilinniartitsisoq: Tasiilami meeqqat inuusuttuaqqallu sumiginnagaanerat ajorluinnarpoq

Tasiilami meeqqat inuusuttullu atugaat ajorluinnarnerarpai.

- Meeqqat, inuusuutut ilaqatariillu pisariaqartitaviminnik ikiorserneqartanngillat, taamak Rikke Blegvad ukiuni arfinilinni atuarfimmi sulisuusimasoq oqarpoq.  

Immikkut atuartitsinermut siunnersortaanermi saniatigut atuarfiup kommunellu akornanni ataqatigiissaarisuuvoq.

Atuarfimmit nalunaartoqarniartillugu akisussaasutut sapaatip akunneranut arlaleriarluni kommunenut attaveqartarpoq.
Sulinermini kommunep sullissinera annertuumik ajornartorsiorfiusoq arlaleriarluni misigisarsimavaa.

AAMMA ATUARUK Tasiilami arnat nakluuserfigineqarsimasut qimarnguittaarput

Angajoqqaat meeqqallu atuarfitsinni oqaluttuuttarpaatigut kommunemut aggersagaasimasaratik, uterfigineqarnissamik neriorsorneqarsimatillutik uterfigineqaratik, allamullu sullinneqaqqinnissaminnut innersuunneqarsimasaratik.

Kommuneqarfik Sermersooq naapertorlugu inunnik sullissisunik arfinilinniit arfineq pingasunut aningaasaliisoqarsimavoq, massakkulli inunnik isumaginnittutut atorfilllit marluupput.

Nuummilu kommune tamakkerlugu saaffiginnissutinik tigooraasoqarpoq.

Inunnik isumaginnittunik ataarvartumik atorfilinnik amigaateqarneq sullissinermut sunniuteqaaaq.

Sullissisunut pingaartumillu angajoqqaanut meeqqanullu pissutsit toqqissiviilliornarput.

Angajoqqaammi ilaqutariilluunniit saaffiginnikkaangamik tamatigut nutaamik sullinneqartarput.

Atukkatik nutaamik aallaqqaataaniik oqaluttuareqqittariaqartarpaat. Meeqqanut aamma tamanna atuuppoq. Ataavartumik sullinneqanngillat. tamatigut nutaamnit sullinneqartarput.

Tasiilami inunnik isumaginnittut suliassaminnik ataasiaannarnatik sumiginnaasut Rikke Blegvadip nalaassimavai.

Meeqqat inuusuttullu angajoqqaaminnut angajoqqaarsiaminnulluunniit angerlarusunngitsut atuarfimmi nalaattarpagut, ilaatigullu misigisarparput kommunemut attaveqaraluarluta akisoqanngitsoq, ajornerpaatillugulu kommunep ikiorumanata atuarfiliarsinnaanngineraasut aqqusaarnikuuagut.

Inunnik isumaginnittut pissutsinik tamakkiisunik ilisimaarinninnginnerat taassumalu kingunerisaanik pisut ingerlateqqittariallit uterfigineqartariallilu maangaannartinneqartarneri ilaatigut aamma taakkartorpai.

AAMMA ATUARUK Tasiilami annaasaqarsimasunut tapersersoqatigiittarfinnik pilersitsisoqartoq

Martha Lund Olsen Kommuneqarfik Sermersuumi Meeqqanut Ilaqutariinnullu ingerlatsivimmi pisortaavoq. Taassuma Tasiilami meeqqanut inuusuttuaqqanullu isumaginninnikkut suliat iluamik malittarisassalluunniit malillugit suliarineqartannginnerat nassuerutigaa. Martha Lund Olsen naapertorlugu kommunip Tasiilami sulisussarsisinnaannginnera ajornartorsiutaangaatsiartut ilagaat.

- Isumaqanngilaq atorfissaqartitsinngitsugut. Atorfininniartoqanngitsoruna. Piffissami kingullermi malunnik isumaginninnermik siunnersorteqarpugut ataatsimillu ilaqqeqqammerput, sapaatip akunneratalu tulliani ataatsimik ilaqqinnissaat naatsorsuutigaarput, Martha Lund Olsen oqarpoq.

Meeqqat inuusuttullu ulluinnaannut ajornartorsiutit sunniutai annertupput, Rikke Blegvad naqissusiivoq.
Inuunerat artornarseqqasarpoq tamanna ersertarpoq imminorusunnerminnik oqaluleraangata. Atuarnerminni malinnaaniapiloortarput.
Inuunermi ajornartorsiutit inituallaaleraangata kalaallisut, matematik qallunaatullu malinnaanissaq erloqinartarpoq.

Rikke Blegvadip isornartorsiuinera ukiuni kingullerni Isumaginninnermut Naalakkersuisut kiisalu Meeqqat Illersuisuisa nalunaarusiaasa imarisaanut inunnik isumaginninnerup meeqqallu atugaasa ajornartorsiornerannut tunngasununut qanippoq.

AAMMA ATUARUK Tasiilami pinerluttuliornerpassuit