Tasiilami arnat nakluuserfigineqarsimasut qimarnguittaarput

Qimarnguik arnanut meeqqanullu nakuusernermik eqqugaasimasunut tuaviortumik toqqissisimanartumillu siniffissaannik peqarpoq.

Arnat nakuusernermik eqqugaasimasut qimarnguiup ilaqutariinnut siunnersortaanit, qimarnguivimmi toqqissisimasumi ikiorneqartassapput, inooqatigiinneq, inuunermilu atugarisat allat pillugit sulisut oqaloqatigineqarsinnaassallutik.

- Arnarpassuit angerlarsimaffimmi nakuusernermik ajoraluartumik eqqugaasarput. Arnat kisimik eqqugaaneq ajorput, amerlasoorpassuartigut meeqqat aamma eqqugaasarmata. Tamanna nammineerluni alianartuuvoq. Taamaammat nuannaajallannarpoq ullumimiit, Tasiilami arnat meeqqallu pinartumik illersorneqarnissaminnik pisariaqartitsisut, toqqissisimaarfigisinnaasaannik neqeroorfigisinnaaleratsigit. Ullumikkut ulloq pilluarnartuuvoq, Uju Petersen, Kommuneqarfik Sermersuumi Meeqqanut Ilaqutariinnullu ataatsimiititami siulittaasoq oqarpoq.

Qimarnguivittaap aqqa tassaavoq "Naaqqavi".

Kommuneqarfik Sermersuumi kommunalbestyrelsi 2016-imut missingersuummi, Tunumi illoqarfiit annersaanni qimarnuvimmik pilersitsisoqarnissaanut ingerlatsisoqarnissaanullu aningaasanik immikkoortitsivoq. Qimarnuvik ”Kattunneq - Grønlands Krisecentre” suleqatigalugu piviusungortinneqarpoq.

Danskit kalaallillu akornanni suleqatigiiffiuvoq, Mary Fonden, Danner, Kalaallit Nunaanni qimarnguviit, Mælkebøttecentret, Isumaginninnermut, Ilaqutariinnut, Naligiissitaanermut Inatsisinillu Atuutsitsinermut Naalakkersuisoqarfik aamma OAK Foundation Denmarkimit peqataaffigineqartoq.