Tasiilami annaasaqarsimasunut tapersersoqatigiittarfinnik pilersitsisoqartoq

Tasiilami meeqqat inuusuttuaqqallu immikkut ikiorneqarnissaminnik pisariaqartitsisut pillugit Tasiilami Alivarpi annaasaqarsimasunut tapersersoqatigiittarfimmik pilersitsivoq.

- Meeqqat inuusuttuaqqallu aliasuuteqarnertik pillugu ikiorneqarnissaminnik ikorfartorneqarnissaminnillu pisariaqartitsisut arlallit atuartuutigaavut, Tasiilami Alivarpiup pisortaa, Karsten Sandau, oqarpoq.

Atuartut immikkut ikiortariallit ikiorserneqarnissaat anguniarlugu Tasiilami meeqqat atuarfiat annaasaqarsimasunut tapersersoqatigiiffinnik marlunnik pilersitsivoq - aappaa meeqqanut minnernut aappaalu annernut. 

- Taamaaliornitsigut ajornartorsiutaasa annertuserujussuannginnerini aaqqissuutamik ikiorneqarnissaat aamma klassini akuullualernissaat anguniarlutigu, pisortaq oqarpoq.

Annaasaqarsimasunut tapersersoqatigiittarfiit februaarip 22-anni siullerpaamik naapisimaartinneqarput. Tamassuma kingorna atuartut minnerit annerillu paarlakaallutik pingasunngornikkut naapisimaartinneqartalissapput.

Meeqqat inuusuttuaqqallu annaasaqarsimanermikkut artorsaateqartarneri pillugit Ilinniartitsisut marluk ikiorsiinissamik ilisimasaqartut naapeqatigiittarnernik ingerlatsisuussapput.

Meeqqat inuusuttuaqqallu ikorfartoqatigiinnermut peqataasarnissaat piumasaqaataanngilaq.