Tasiilami eqqaavissuaq nammineerluni ikuallalersimasoq
Tasiilami eqqaavissuaq nammineerluni ikuallalersimavoq.
Tasiilami politiini politikommissæri, Steen Skovlind, taama ilisimatitsivoq.
Taassuma nassuiarpaa eqqakkat annertuut sioqqamik qallerneqarsimasut akornanni gasseqalerlutik, naqitsineqalerlutillu kissassimasut.
- Qaleriiaat ilaat ikuallalersimapput, taakkualu sapaatiummat nalunaaqutaq 15 aamma 21-p akornanni aamaarsimapput, qatserisartullu nalunaarutigaat ikuallanneq qamissimasoq, politikommissæri oqarpoq.
Ajoqusertoqarsimanngitsoq
Taassuma ilanngullugu oqaatigaa:
- Maskiinat assaatit eqqaavissuarmi assassimapput ikuallannerullu qaminnissaata tungaanut imermik kueraasimallutik.
Ullumi eqqaavissuaq - Steen Skovlind naapertorlugu - biilinut unittarfittut isikkoqarpoq.
Ikuallannermut atatillugu inunnik uumasunilluunniit ajoqusertoqarsimannginneranik politikommissæri ilisimatitsivoq.
Tallimanngormalli ikuallattoqarneranik pingajussaat kalerriisoqarpoq.
Tallimanngormat Qaqortup eqqaani nuna ikuallappoq, taannalu arfininngormat qaminneqarpoq.
Taamaalisukkut Upernaviup eqqaani Aappilattumi illu ikuallalersimavoq. Ikuallannermut atatillugu angut Upernavimmi napparsimmaviliaanneqarsimavoq.