Tasiilami ajunaarnermut ikiuigasuarnissaq partiit tapersersorpaat
Tasiilami innuttaasut sapaatip unnuaani piterarujussuarnerani sinissinnaasimappata sapaammi ukkaakkut illoqarfimmi aseruatiternerpassuarnut itersimassapput.
Inunnik qujanartumik ajoqusertoqanngilaq. Kisianni illut, angallatit, biilit, qamuteralaat atortullu allat aseruatiterput.
Landskarsip ajunaarnermut ikiuinissamut kontoanit illoqarfimmi innuttaasunut aningaasatigut Naalakkersuisut ikiuinissaat taamaammat inissaminiippoq.
AAMMA ATUARUK Borgmester efter piteraq i Tasiilaq: Vi vil bede Naalakkersuisut om katastrofehjælp
Taama isumaqarpoq Doris J. Jensen, Siumut.
- Qanoq aseruatitertoqarsimatiginera massakkut takusinnaavarput. Siumut Inatsisartuni gruppianit taamaammat kissaatigaarput ajunaarnermut ikiuinissamut aningaasat ingerlaannaq aallartisarneqassasut. Piterareerneratami kingorna pisut ajunaarnertut isigineqarsinnaapput, oqarpoq.
Kisianni erseqqissarusunngilaa aningaasat qanoq amerlatigisut sanaqqinnermut atorneqartariaqarnersut. Tamanna partiimit Naalakkersuinut Kommuneqarfik Sermersuumullu oqaloqatigiissutigineqaqqaassaaq. Tamannalu pipallattariaqartoq Doris J. Jensen naqissusiivoq.
- Ajunaarnermut ikiuinissamut aningaasat aallartisarneqapallassapput. Inuussutissarsiuteqartut inuussutissarsiutiminnik ingerlatitsiinnarsinnaaqqullugit qulakkeerneqassapput, ilaqutariillu piteqqamit eqqugaasimasut kommuni peqatigalugu ikiorneqassallutik, oqarpoq.
Naleraq: Namminersorlutik Oqartussat selskabii aningaasaliisariaqarput
Naalakkersuisut Inatsisartunilu Aningaasaqarnermut Akileraartarnermullu Ataatsimiititaliap aalajangertussaavaat landskarsip ajunaarnermut aningaasaateqarfianit qaqugukkut aningaasaliisoqassanersoq. Aningaasanut inatsit naapertorlugu, ajunaarnersuaqartillugu ikiorsiissutaasinnaasunik, innuttaasunut sillimmaserneqarsimanngitsunut 10 millionit koruuninik uninngasoqarpoq.
Tunumi illoqarfimmut ajunaarnermut aningaasatigut ikiuisoqarnissaa Naleqqamit aamma tapersersorneqartoq Emanuel Nûko oqarpoq.
- Innuttaasorpassuit angallataarserput, angerlarsimaffiat aserorluni, inuillu sillimmaserneqanngitsut erngertumik ikiorneqassallutik.
Illumut sillimmasiisimasut, ajoqusernernulli sillimmasiisarfimmit matussuserneqanngitsunut aamma ikiuisoqartariaqartoq tikkuarpaa.
Ilutigitillugu Namminersorlutik Oqartussat selskabiutai, soorlu Air Greenland, Royal Greenland aamma Kalaallit Airports Tasiilami eqqaanilu innuttaasunut eqqugaasunut katersuiniartariaqartut Naleraq kajumissaarivoq.
AAMMA ATUARUK Mikkel Bianco: Piterarmat sarfaarukkatta annilaangaleraluarpugut
Inuit Ataqatigiit aamma nalunaaruteqarput sapaatip akunnerata naanerani piteqqap aseruatiterinerata kingorna Tasiilami sanaqqipallannissaq innuttaasunullu aningaasaqarnikkut ajornartorsiortunut aningaasatigut ikiuinissaq tapersersorlugu.
- Aningaasanut inatsimmi ajunaarnermik pisoqartillugu kontop aallartisarneqapallannissaa kajumissaarutigaarput, taamaarliornikkut nunaqqatitsinnut ikiuigasuartoqarsinnaassammat, IA tusagassiorfinnut nalunaarummi allappoq.
KNR-ip Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund aperaa, nunatta karsianit ajunaarnersuaqartillugu ikiorsiissutinik partiit kissaataat qanoq isumaqarfiginerai:
- Tassa siullermik oqaatigissavara, aqagu (ullumi aaqq.) Tasiilaliassagama pisimasut nammineerlunga qimerlooriartussavakka, tassanngaanit sulineq aallartissaaq, ilumoorpoq aningaasanik periarfissaqarpoq, taamatut ikiorsiissutinik atorneqarsinnaasunik aamma isumaqataavunga, aningaasat taakkua atorneqartariaqassapput, Kalistat Lund oqarpoq.
Aningasat qanoq amerlatigisut pineqarnersut imaluunniit qaqugu tunniunneqarumaarnersut taassuma oqaatigiumanngilaa.
